O BNG de Redondela ven de presentar unha moción na que solicitan o apoio do restos dos grupos presentes na corporación para reclamarlle conxuntamente á Xunta de Galicia a creación do Observatorio Galego da Violencia de Xénero, un órgano institucional que debería encargase do estudo, avaliación e seguimento das políticas de violencia de xénero.
Unha medida que entenden fundamental a fin de contar con organismos e persoal especializado que permita facer unha análise sostida no tempo sobre a efectividade das medidas tomadas neste terreo e, consecuentemente, mellorar a eficacia das políticas e recursos que se dedican a esta finalidade.
O BNG solicita tamén a posta en marcha do Centro de Recuperación Integral e que dende a administración autonómica se faga unha planificación para a realización de campañas periódicas de sensibilización contra a violencia de xénero, que se realice á formación das e dos profesionais implicados na atención e tratamento das vítimas, e que se garanta o dereito á atención psicolóxica no ámbito sanitario público cuestión tamén recollida na lei.
