Hoxe é Mércores 4 de Agosto de 2021

O C.F. Chapela está á espera de coñecer o seu futuro deportivo e na directiva

RR_Noticias

Rematada a liga na Primeira Autonómica o Chapela descoñece aínda en que categoría militará na próxima temporada. Non sufriron o descenso directo, pero poderían verse prexudicados polos arrastres de categorías superiores. No plano da directiva tamén podería haber cambios. O actual presidente, José Luis Ballesteros, enfróntase a unha moción de censura que se resolverá o 22 de maio.

O futuro do Club de Fútbol de Chapela é aínda incerto, tanto no plano deportivo como da súa directiva. Unha vez rematada a liga na Primeira Autonómica, o equipo redondelán quedou nunha posición que non garante a permanencia. Logo do empate co filial do Bouzas ocupan a 14ª praza da táboa. Non sofren o descenso directo, que corresponde a Castrelos, Bouzas B e San Marín, pero están expostos ó que aconteza nas categorías superiores. Os posibles arrastres polo descenso de quipos galegos desde a Segunda B, Terceira División e Preferente Sur teñen ó Chapela -e tamén ó Arcade- pendente dun fío. O presidente do club, Jose Luis Ballesteros, fai agora balance dunha liga “con altibaixos”, na que o equipo padeceu “a falta de experiencia” dos seus xogadores nesta categoría. Ballesteros achaca á “xuventude” dos rapaces os resultados irregulares do equipo, pero amósase convencido da necesidade de seguir apostando “pola canteira” do club, xa que foron os mesmos xogadores que conseguiron o ascenso do equipo desde a Segunda Autonómica. O proxecto para a próxima temporada variará, en función de se o equipo mantén ou non a categoría. Pero tamén dependerá dos posibles cambios que se dean na directiva. De feito, o próximo día 22 de maio a actual directiva enfróntase a unha moción de censura promovida por un grupo de pais de xogadores das categorías inferiores. O candidato alternativo a dirixir o club é Carlos Béjar Luque, e a decisión tomarase por votación na Asemblea Xeral que se celebre o domingo 22 no Multiusos de Chapela, ás 11.00 horas.  

Jose Luis Ballesteros presidente
O futuro do equipo pasa polos posibles arrastres que poida haber de categorías superiores.
Moción de censura
O club está pendente do que aconteza na Asemblea Xeral coa presentación dunha moción de censura.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *