Hoxe é Venres 26 de Febreiro de 2021

O Ribadumia sorprende ó Choco cunha rápida remontada no campo da Senra

RR_Noticias

De pouco lles serviu ós redondeláns anotar no segundo minuto do partido. A vantaxe no marcador só lles durou o primeiro tempo. Na continuación os locais déronlle a volta ó encontro e fixéronse cos tres puntos. Xa na Primeira Autonómica goleada do Chapela sobre o San Adrián, que leva ós de Ferreira a postos que garanten a salvación; mentres o Arcade complícase cun empate que os afunde no descenso.

Preferente Autonómica
Ribadumia 3-2 Choco
Os de Julio Álvarez comezaron o encontro no campo da Senra adiantándose moi cedo. Nada máis comezar o partido, no minuto 2, un gol de Lojo doulle a vantaxe ós redondeláns. E os locais non conseguiron a igualada ata o inicio da segunda parte. Foi nos dous primeiros minutos da continuación, Diego Cebreiro e Samu marcaron cadanseu gol nos minutos 46 e 47, sorprendendo ó Choco, que viu como nun intre pasaba de estar por diante no marcador a perder o encontro. Xa no minuto 66 Álex, logo dunha boa xogada de contra, poñía o 3-1 no marcador. Os redondeláns conseguiron acurtar distancias cun gol de Calo no minuto 77. O 3-2 fixo sufrir ós locais nos últimos minutos de xogo, sobre todo logo da expulsión de Diego Cebreiro, pero os de Julio Álvarez non conseguiron aproveitar a superioridade numérica para igualar o partido. Malia a derrota, o Choco segue na metade da táboa, nunha situación cómoda que garante a permanencia. A próxima xornada terá ocasión de mellorar a súa situación xa que recibe en Santa Mariña á Peroxa, o pechacancelas, que só leva sumados tres puntos nesta temporada.
Primeira Autonómica
Chapela 4-1 San Adrián
O Chapela desarmou ó San Adrián e goleouno. Os de Luis Ferreira foron os dominadores do xogo ó longo de todo o partido, e o rival non reaccionou. A vitoria supón para o Chapela tres puntos de ouro, que os deixan nunha situación da táboa máis cómoda, son 13º. Esta posición garante a salvación, aínda que queda por diante un final de liga moi duro. De feito o domingo xogan no campo do Arcade. E os de Jacobo Montes sairán a por todas, xa que precisan os puntos á desesperada para evitar o descenso.
Arcade 1-1 Gondomar
O equipo de Soutomaior non conseguiu pasar do empate nun encontro que estivo moi igualado e con ocasións para os dous equipos. Os de Jacobo Montes xogaron de igual a igual diante dun dos equipos máis fortes do grupo, que actualmente é o 3º da liga. Finalmente os porteiros das dúas formacións foron os protagonistas, con boas intervencións que evitaron un marcador con máis goles. Reparto de puntos que non evita que o Arcade continúe en postos de descenso, é 16º. Moi importante se prevé o derbi comarcal que se xoga o domingo, o Arcade-Chapela podería ser un avance para os de Soutomaior ou afundilos case definitivamente.
Terceira Autonómica
Cesantes 1-1 Cruceiro B
Os redondeláns baixan á 7ª praza logo do empate cun dos equipos da parte alta, o filial do Cruceiro. A próxima fin de semana xogan no campo do Caroi, da zona baixa da clasificación.
Arcade B 1-0 Soutomaior
Interesante derbi entre os dous equipos do municipio no que se fixo valer o factor campo. Pese a levar feito unha campaña moito máis modesta, o filial do Arcade impúxose pola mínima, o que lle serviu para recortar distancias co Soutomaior. Agora o Arcade B é 9º e o Soutomaior 7º. Na próxima fin de semana dispútanse o Pontecaldelas-Arcade B e o Soutomaior-Salcedo.
Choco 2-1 Teis
A vitoria deixa ó Choco na terceira praza do grupo. O domingo xogará no campo do Balaídos, o 5º clasificado.
Vilar-Mosende: aprazado
O Vilar xogará o domingo en Nigrán, equipo da metade da táboa.
Nespereira 2-2 Vilasobroso
O reparto de puntos deixa ós de Pazos na 10ª praza, o domingo xogan no campo do Castelo, o 5º do grupo.
Futbol Sala-Autonómica Sur
Erichkrause 5-6 Redondela F.S.
Aos pupilos de Manoliño dánselle mellor os equipos da parte alta da táboa que os da súa liga. O resultado, cun disputado marcador a favor dos redondeláns pon unha vez máis en evidencia esta situación. Os resultados negativos dos rivais directos mellora algo a situación do Redondela F.S., que acurta distancias, aínda que continúa en postos de descenso. A situación aínda é moi complicada, ao que engadir o lastre que acumula o conxunto redondelán a nivel físico, con lesións e unha sobrecarga importante para algúns xogadores que acumulan moitos partidos. No club modificaron o esquema de adestramentos e descansos, para tentar mellorar a situación. Manoliño agarda que os cambios “sirvan para recuperar a algúns xogadores importantes” de cara á última fase ligueira. A próxima fin de semana xoga na pista do Quinta Xestión, a cita será ás 18.30 horas no Pavillón Novo
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *