As celebracións comezarán o sábado 14 de febreiro co Entroido Infantil e Xuvenil, xogos e obradoiros na Alameda Castelao e pasarrúas con The Turre´s Band. O campo da feira acollerá o gran concerto da orquestra La Fórmula coa estrea en Redondela do seu novo espectáculo. O domingo 15 será o desfile de comparsas. O Martes de Entroido contará coa tradiconal Queima do Meco e o espectáculo “Hexagonum” nunha xornada que rematará co concerto da Mekánika Rolling Band. En Chapela o Entroido celebrarase o día 21 co desfile de comparsas, o Enterro do Berete e o concerto do Grupo América de Vigo.
As celebración do entroido arrancará o sábado 14 de febreiro co Entroido Infantil e Xuvenil a partir das 16.00 horas con “Un Mar de Xogos” de Bico de Toupa e diferentes obradoiros na Alameda de Castelao. A música correrá a cargo do grupo The Turre´s Band cun animado pasarrúas polo centro da vila desde as 18.00 horas. A partir das 21.30 horas chegará o concerto da orquestra “La Fórmula”, que estreará en Redondela o seu novo espectáculo para esta temporada. “Será un gran comezo do Entroido para animar á veciñanza a gozar e bailar nestas datas tan especiais”, sinala a concelleira de Cultura Rita Pérez, que contará tamén con sesión DJ.
O domingo de Entroido contará co tradicional desfile de comparsas a partir das seis da tarde precedidas polo pasarrúas de Tío Emilio.
Martes de Entroido
O Martes de Entroido, día 17, as actividades organizadas dende a Concellería de Cultura comezarán ás cinco co Desfile-Concurso de Disfraces individual e colectivo. As inscricións para participar poderán facerse nos soportais do Concello desde as 16.00 e a entrega de premios será ás 18.45 horas.
Os máis pequenos terán o seu espazo na Alameda Castelao con diferentes obradoiros desde as 17.00 e ata as 19.30 horas. As rúas contarán con moita animación e ritmo grazas á percusión e os tamboriles do grupo Aperta.
Ás 19.00 horas, fiel á súa cita, celebrarase a tradicional queima do Meco “unha das citas con máis expectación do entroido redondelán”. “Hexagonum”, de Troula Animación, será o espectáculo que dea paso á queima con marionetas xigantes, proxeccións audiovisuais, pirotecnia e lume. A festa continuará pola noite co concerto da Mekánica Rolling Band, unha das agrupacións máis festivas de Galicia e coñecida pola súa explosiva mestura de ritmos populares, punk brass e interacción co público. Ás 20.30 horas na praza da Constitución.
A alcaldesa, Digna Rivas, sinala a importancia desta xornada tan tradicional nestas festividades de Redondela “que reúne a grupos de amigos e familias completas con participantes de todas as idades que viven o Entroido na rúa, por iso desde o Concello poñemos todo da nosa parte para que sexa un día moi especial cheo de actividades”.
Entroido en Chapela
O Entroido en Chapela chegará o sábado 21 de febreiro. As comparsas reuniranse ás 17.00 horas do alto da Encarnación. Ás 18.00 horas sairá o desfile acompañado polos percusionistas e tamborileiros de Aperta. Pecharán a comitiva os participantes do Enterro do Berete que fará o seu percorrido ata a praia de Arealoga. A queima do Berete será ás 20.15 comezará. A xornada pecharase co concerto do grupo América de Vigo que ofrecerá un gran espectáculo co seu tributo a toda a historia do rock and roll, facendo un repaso dos grandes éxitos de todos os tempos. Será a partir das 21.00 horas no paseo marítimo de Chapela e con sesión do Dj Mesu.
O Concello prepara unha ampla programación “con festa rachada” durante catro días para darlle “máis pulo aínda” a esta tradicional festa “que con tanto entusiasmo viven no municipio veciños e veciñas de todas as idades”, conclúe Digna Rivas.
