O Concello de Soutomaior celebra un dos días máis ilusionantes do ano: a chegada dos Reis Magos de Oriente. A xornada de hoxe 5 de xaneiro, chea de maxia e tradición, incluirá contacontos, visitas polos barrios, unha colorida cabalgata e unha recepción real, todo deseñado para que nenos e adultos desfruten en igualdade de condicións.
A mañá comezará cedo na Casa da Cultura Rexina Míguez Noval, onde ás 10:30 horas se ofrecerán os “Contos Reais”, unha actividade pensada para mergullar aos máis pequenos no mundo da fantasía. A continuación, de 11:00 a 11:30 horas, os Reis Magos recibirán aos veciños no mesmo espazo, marcando o inicio dunha xira polos barrios do municipio. Os monarcas visitarán lugares como Romariz (Campo de San Benito, ás 11:40), Comboa (Veiguiña Longa, ás 12:00), Aranza (O Cotiño, ás 12:30), Cortellas (O Eirado, ás 12:45), Moreira (O Souto, ás 13:15), Lourido (Chan da Moreira, ás 13:30), Val Sobral (Praza, ás 13:45), Rial (Igrexa do Divino Salvador, ás 14:00) e rematarán en Alxán (Escola Obradoiro, ás 14:15). Dende o Concello advirten que estes horarios son orientativos e poderían sufrir lixeiros retrasos dependendo da duración das visitas.
Pola tarde, o prato forte será a cabalgata, que sairá ás 17:30 horas do cruce do Viso e percorrerá as rúas Xosé Solla, Rosalía de Castro e Talo Río ata o seu fin. Este ano, o desfile destaca pola súa inclusividade: incluirá un tramo silencioso desde o inicio ata antes do cruce da Praza de Cima de Vila de Arcade, ideal para persoas con diversidade funcional. Ademais, ofreceranse auriculares en préstamo e un acceso prioritario sen colas para elas na recepción final en Talo Río.
A cabalgata promete ser un espectáculo cheo de cor e alegría, coas Súas Maxestades acompañadas por unha carruaxe de fantasía animada polas populares K-pop, animacións doces con galletas de xenxibre, ninfas e multitude de personaxes de fantasía e animación. Non faltarán os clásicos coches 600, que engadirán un toque nostálxico ao evento. Durante o percorrido, repartiranse máis de 400 quilos de caramelos sen glute, garantindo que todos poidan gozar sen preocupacións.
O desfile rematará arredor das 18:45 horas na Carpa de Nadal en Talo Río, onde haberá música e a gran Recepción Real a partir das 19:15 horas. Alí, os nenos e nenas poderán conversar cos Reis Magos, entregar as súas cartas e facerse fotos cos personaxes do desfile.
Para garantir a seguridade e o bo desenvolvemento do evento, o Concello activará un operativo especial de tráfico. Os cortes de circulación comezarán como moi tarde ás 17:15 horas, e estará prohibido estacionar na Avenida Xosé Solla (desde o cruce de Cochón ata Abanca) a partir das 14:00 horas do mesmo día. O tráfico procedente da N-550 cara a Rosalía de Castro desviará pola rúa da Coutada ata Roxelio Landeiro, desde onde se poderá dirixir a Ponte Sampaio ou circular cara a Soutomaior pola rúa do Conde, habilitada en dobre sentido só durante a cabalgata.
