Foto de Manolo “Casa Paco”, fundador e impulsor da iniciativa
O Grupo Casa Paco 81 de Redondela puxo en marcha a súa tradicional campaña de Nadal de recollida de alimentos para Cáritas Redondela.
Desde a organización desta iniciativa solidaria explican que as persoas interesadas en colaborar xa poden contribuír depositando todo tipo de alimentos non perecedoiros nos dous puntos habilitados: o pavillón de Redondela-Reboreda e o Multiusos da Xunqueira. A campaña permanecerá aberta ata o 30 de decembro.
Casa Paco distínguese durante todo o ano pola súa intensa labor social e por promover iniciativas deste tipo. Grazas a esta campaña, no ano 2024 o grupo entregou 400 quilos de alimentos a Cáritas Redondela. Ademais da axuda da veciñanza, a iniciativa conta tamén coa colaboración da empresa New Balance (afincada na Rúa do Muro), que todos os anos doa material deportivo e alimentos non perecedoiros que, á súa vez, se entregan a Cáritas.
