O BNG defende a remunicipalización da recollida do lixo orgánico

A recollida do lixo urbano vaise desenvolver nos cascos urbanos de Chapela e Redondela, onde se recollerá tres días a semana. No resto das parroquias, segundo explica o voceiro nacionalista Xoán Carlos González “os veciños e veciñas deberán conformarse con asumir o reparto de composteiros caseiros para reducir os restos orgánicos”.  O BNG solicita que o goberno asuma a xestión directa da recollida do colector de residuos orgánicos por entender que sería “unha xestión máis eficiente”.

A súa proposta non conta co apoio de PP, PSOE e AER que no pleno de agosto aprobaron a modificación do contrato con Urbaser. Explican dende o Bloque que os tres grupos “puxéronse de acordo apoiando unha modificación do contrato da recollida do lixo da que a grande beneficiada vai ser Urbaser, que vai percibir 600.000 euros en dous anos para o tratamento dos residuos do cuarto contedor. Unha vez máis, critica González “o goberno de Digna Rivas renuncia a realizar un verdadeiro control sobre a xestión dos fondos públicos”.

Na proposta recóllese tamén que o concello comprará por valor de 200.000€ a Urbaser, un camión do que xa dispón a propia empresa. “Ademais o mantemento do camión tamén será a cargo do concello” feito que González cualifica de “negocio redondo” para a empresa. Ironiza que mesmo se abonará a limpeza dos contenedores á mesma empresa que tén abandonado esta parte do contrato vixente en Redondela. Outro dos puntos do acordo refírese ao abono da nómina do conductor nocturno durante dous anos.