As obras de mellora do Camiño de Santiago ao seu paso polo núcleo urbano de Arcade, en Soutomaior, avanzan a bo ritmo e estarán rematadas antes de que finalice 2025. Este proxecto, cun investimento de 750.000 euros —financiado a partes iguais por fondos municipais e unha subvención do Fondo de Cooperación Local—, está a transformar a mobilidade e a calidade de vida da veciñanza, ao tempo que mellora a experiencia dos milleiros de peregrinos que transitan por esta ruta histórica.
O alcalde, Manu Lourenzo, acompañado polo concelleiro de Obras, Pablo Garrido, o director de obra, Enrique Urcola, e o xefe de obra da empresa COVSA, visitou os traballos na rúa Coutada e na rúa Fonte do Conde. Lourenzo destacou a importancia estratéxica desta actuación: “Estamos creando espazos máis amables, sostibles e seguros, mellorando o saneamento e protexendo a nosa ría. Esta obra é o primeiro paso dunha transformación integral do núcleo urbano de Arcade, que continuará con proxectos como a Praza de Talo Río, Rosalía de Castro e Portal do Ribeiro”.
Entre os avances máis destacados, destínanse case 150.000 euros á renovación da rede de sumidoiros, unha medida clave para evitar verteduras á ría e mellorar a sustentabilidade ambiental. Ademais, as obras están deseñadas para minimizar as molestias tanto para o tráfico rodado como para os peóns, garantindo a normalidade no día a día da veciñanza e dos peregrinos.
