Estas tres alumnas do CEP Santa Mariña fixéronse co premio convocado pola empresa Aqualia en colaboración coa Concellería de Medio Ambiente no que participaron un total de 75 nenos e nenas de 3º e 4º de primaria dos centros educativos de Redondela. A temática dos carteis tiña que centrarse no coidado da auga e do medio ambiente para acadar un desenvolvemento sostible e mellorar o planeta.
A gañadora do concurso, Salomé, de 4º, recibiu como agasallo unha tableta, e Ariadna e Sofía, ambas de 3º, gañaron cadanseu reloxo intelixente como finalistas.
A alcaldesa de Redondela, Digna Rivas, e o concelleiro Alberto Álvarez, responsable de Medio Ambiente, recibiron no Concello ás gañadoras xunto con Ramiro Gutiérrez, Xefe de servizo de Aqualia en Redondela.
Desde Aqualia, empresa concesionaria do abastecemento e saneamento da auga, ofreceron aos centros de ensino de Redondela un completo programa de actividades en paralelo ao concurso de debuxo. A través de cómics, vídeos, xogos e unidades didácticas a rapazada puido aprender sobre o cambio climático e a relevancia do ciclo integral da auga. Os protagonistas da campaña son uns superheroes chamados “Gardiáns Sostibles”, encargados de protexer o planeta e que inculcan aos nenos e nenas actitudes sostibles para o seu día a día.
