Foto de parte do equipo de MeigArco
O Club de Tiro con Arco MeigArco pechou a tempada deportiva cun balance marcado polos bos resultados tanto nas competicións galegas como nos campionatos de España. A entidade redondelá suma, ademais, dous títulos na clasificación xeral da Liga 3D-Bowhunter Portugal, onde Mel Sanjorge e Raquel Domínguez se proclamaron campioas das súas respectivas categorías.
A última xornada da competición portuguesa levou aos arqueiros a afrontar un percorrido de 20 postos a unha única frecha. As grandes distancias, os desniveis do terreo e a colocación das piquetas con respecto ás figuras incrementaron a dificultade dunha proba na que os representantes do Meigarco volveron situarse entre os primeiros clasificados.
Na tirada, Mel Sanjorge e Raquel Domínguez conseguiron o primeiro posto nas súas respectivas categorías, mentres que Txema Rodríguez e Alejandro López finalizaron en cuarta posición. Rodríguez destacou tamén nos Shoot Off posteriores á competición, onde conseguiu a vitoria e quedou a só un punto do terceiro posto na clasificación xeral da liga.
Os resultados acumulados ao longo da tempada permitiron a Mel Sanjorge conquistar o título na categoría ALO feminina, distancias descoñecidas, mentres que Raquel Domínguez foi primeira na categoría ARI feminina, tamén con distancias descoñecidas. Alejandro López terminou cuarto na categoría ADE masculina e Txema Rodríguez foi cuarto na categoría ACO masculina.
Numerosos podios no balance de tempada do Meigarco:
Estes resultados poñen o punto final á participación do club nesta competición portuguesa, pero forman parte dun balance moito máis amplo para o Meigarco. Ao longo da tempada, os arqueiros redondeláns conseguiron numerosos postos de honra nas diferentes xornadas da Liga Galega de Sala, con vitorias, podios e clasificacións entre os primeiros postos en probas celebradas en localidades como A Rúa, Meis, O Barco, Taboadela ou Corme.
Tamén chegaron bos resultados nos campionatos galegos e nas competicións estatais. No Campionato Galego de equipos celebrado en Arteixo, o Meigarco conseguiu a prata por equipos recurvos, mentres que nos Campionatos de España de sala os seus representantes acadaron un ouro e un bronce no apartado de arco tradicional, longbow e arco espido.
A tempada deixou igualmente resultados destacados nos Grandes Premios de España de campo e 3D. No primeiro Gran Premio de España de 3D, disputado en Sierra de Fuentes, o club conseguiu unha prata, mentres que no segundo Gran Premio de Campo, en Navaluenga, sumou outro segundo posto. Na terceira cita estatal de 3D, celebrada en Piélagos, chegou ademais un ouro.
Nas competicións galegas de aire libre, o Meigarco mantivo a súa presenza nos primeiros postos. Na primeira Liga Galega celebrada en Redondela sumou tres primeiros postos, dous segundos e dous terceiros, mentres que na segunda cita, tamén en Redondela, acadou tres vitorias, dous segundos postos e un terceiro.
O tramo final da tempada tamén deixou resultados relevantes nos campionatos galegos e estatais de campo e aire libre. No Campionato Galego de Campo de A Rúa, o club conseguiu catro primeiros postos, dous segundos e un terceiro, mentres que no Campionato Galego de Aire Libre de A Devesa sumou tres vitorias e seis terceiros postos.
Nos Campionatos de España, os arqueiros do Meigarco conseguiron ademais unha prata por equipos mixtos de longbow e un ouro por equipos mixtos de arco tradicional nas competicións disputadas en Madrid.
Coa tempada xa rematada, o club redondelán pecha así un curso no que conseguiu presenza continuada nos podios autonómicos e estatais e dous títulos de liga en Portugal. Un balance que pon de manifesto a actividade dos deportistas do Meigarco nas diferentes modalidades do tiro con arco ao longo da tempada.
