O Servizo de Protección da Natureza (SEPRONA) da Garda Civil de Pontevedra investiga cinco mozos, dous deles menores de idade, pola súa presunta relación cun incendio forestal ocorrido nas Illas Alvedosas, na Enseada de San Simón, onde estaban a acampar de xeito ilegal.
Os investigados son un mozo de 19 anos veciño de Arcade, dous de 18 anos veciños de Soutomaior e dous de 16 anos, veciños de Arcade e Soutomaior. O incendio, ocorrido o 1 de xullo nun dos illotes das Illas Alvedosas, afectou a totalidade do illote situado na desembocadura do río Verdugo, cunha superficie duns 4.000 metros cadrados. A zona pertence a unha Zona de Especial Conservación, incluída na Rede Natura 2000.
A investigación permitiu localizar restos dun campamento e dunha fogueira na zona afectada. As posteriores pescudas permitiron identificar os cinco mozos que pernoitaran e fixeran unha fogueira no lugar do incendio. A inspección realizada polos axentes situou como hipótese máis probable da orixe do incendio un uso neglixente do lume.
A investigación levada a cabo polo Seprona xa foi remitida ás autoridades competentes, estando agora o caso baixo a xurisdición da Sección Civil e de Instrución do Xulgado de Primeira Instancia de Garda de Cangas de Morrazo, así como da Fiscalía de Menores no caso dos dous adolescentes investigados. Están acusados dun presunto delito contra a seguridade pública e o medio ambiente por neglixencia grave.
