O Obradoiro de Estudos Locais Fernando Monroy de Cesantes volveu reclamar ao Concello de Redondela a instalación de bolardos de protección arredor do Cruceiro de Ánimas do Esteiro, un elemento patrimonial que, segundo advirte a entidade, continúa exposto ao risco que supón o intenso tráfico que circula polo Camiño do Esteiro. Xunto á protección física do cruceiro, o Obradoiro reclama a instalación dun panel explicativo sobre o conxunto etnográfico.
A asociación lembra que o cruceiro foi reposto en maio de 2023 grazas á súa iniciativa e que, desde entón, solicitou en numerosas ocasións a adopción de medidas preventivas para evitar novos danos. Lembran que este elemento do patrimonio xa fora derrubado décadas atrás tras ser impactado por un vehículo.
O colectivo sinala que o cruceiro está situado nun dos treitos máis estreitos do Camiño do Esteiro, unha vía pola que tamén transitan numerosos peregrinos. Segundo explica, cando dous vehículos coinciden neste punto, un deles vese obrigado a retroceder ata unha zona máis ampla para facilitar o paso, precisamente o lugar onde se ergue o cruceiro, o que incrementa o perigo de colisión.
Na última reunión mantida co Concello, celebrada o pasado mes de marzo, o Obradoiro trasladou novamente esta preocupación. A resposta recibida foi que a actuación segue pendente dun informe da Policía Local, unha explicación que, segundo a entidade, vén repetíndose desde hai meses nas diferentes xuntanzas celebradas co goberno municipal. A cuestión tamén foi posta sobre a mesa no Consello Parroquial de Cesantes.
Xunto á protección física do monumento, o Obradoiro reclama igualmente a instalación dun panel explicativo sobre o conxunto etnográfico. O documento, elaborado pola asociación, foi adaptado á normativa municipal, revisado polo Servizo de Normalización Lingüística e remitido ao Concello hai máis de medio ano.
Desde o Concello, segundo indica a entidade, argumentouse que a colocación do panel depende da autorización do organismo responsable do Camiño de Santiago. Porén, o Obradoiro subliña que o elemento informativo non estaría situado no Camiño do Esteiro, senón no camiño da Fonte de Ribas, onde conflúen ambas vías xunto ao cruceiro.
Ante esta situación, o colectivo reclama ao Concello de Redondela unha actuación inmediata para garantir a conservación do Cruceiro de Ánimas do Esteiro e completar a súa posta en valor mediante a instalación do panel informativo.
