As aulas CeMIT de Redondela e Chapela ofrecerán formación en Intelixencia Artificial, blogs, ofimática, contabilidade e competencias dixitais entre setembro e novembro
O Concello de Redondela abre o prazo de inscrición para os novos cursos gratuítos de informática que se desenvolverán entre setembro e novembro nas aulas CeMIT de Redondela e Chapela. A programación conta con máis de 100 prazas e inclúe desde formación en ofimática e contabilidade ata contidos relacionados coa Intelixencia Artificial e ferramentas como Gemini.
A iniciativa, impulsada pola Concellería de Novas Tecnoloxías, busca facilitar que a veciñanza poida desenvolverse con maior autonomía nunha sociedade cada vez máis dixitalizada. O concelleiro de Novas Tecnoloxías, Antonio Cabaleiro, explica que a demanda deste tipo de formación medra ano tras ano e lembra que o Concello leva preto de 25 anos ofrecendo estes cursos.
Segundo Cabaleiro, a programación vaise adaptando ás necesidades que van xurdindo. Así, xunto ás materias máis tradicionais, como a ofimática, incorporáronse nos últimos anos contidos vinculados á Intelixencia Artificial. “Hoxe a Intelixencia Artificial xa é o presente”, sinala o concelleiro, que destaca a importancia de aprender a utilizar estas ferramentas de maneira axeitada para buscar información, organizar tarefas ou planificar.
A formación está dirixida a persoas maiores de 18 anos e pretende chegar a perfís diversos. Cabaleiro explica que participan desde persoas xubiladas que buscan adquirir novas habilidades informáticas ata veciños e veciñas que quedaron fóra do mercado laboral e queren actualizar os seus coñecementos para mellorar as súas posibilidades de reincorporación.
A oferta tamén pon o foco en cuestións prácticas do día a día, como os trámites coa Administración pública, o uso de ferramentas dixitais ou a xestión de documentos.
Na Aula CeMIT de Redondela, situada no Paseo do Pexegueiro número 6, os cursos desenvolveranse os luns e mércores. A oferta inclúe formación para crear blogs con Blogger, competencias dixitais con Intelixencia Artificial e Gemini e cursos de FreeOffice, centrados no traballo con textos e follas de cálculo.
Precisamente, Cabaleiro destaca a utilidade das follas de cálculo, non só no ámbito da contabilidade, senón tamén en numerosos postos de traballo nos que se empregan este tipo de ferramentas.
Os venres estarán reservados para a denominada Aula Aberta, pensada para persoas adultas que teñan dúbidas ou necesiten apoio para realizar determinadas tarefas dixitais.
Na Aula CeMIT de Chapela, situada na rúa Manuel Rodríguez Casal número 3, a actividade desenvolverase os martes e xoves.
Neste caso, a programación inclúe Informática Aplicada á Contabilidade, con ferramentas de follas de cálculo; Competencias Dixitais con Intelixencia Artificial e Gemini e unha introdución ao deseño gráfico con Draw de LibreOffice.
Os cursos poden escollerse de maneira independente. É dicir, as persoas interesadas non teñen que matricularse en toda a programación, senón seleccionar aqueles contidos que máis se axusten ás súas necesidades. Ademais, se unha materia ten unha demanda especialmente elevada, o Concello pode volver ofertala en posteriores convocatorias.
Outro dos puntos destacados é que as aulas CeMIT están completamente equipadas con ordenadores. Polo tanto, non é necesario que o alumnado leve o seu propio equipo nin material informático para realizar os cursos.
As aulas manteñen ademais unha programación estable durante todo o ano, con diferentes accións formativas. Cabaleiro lembra que nos últimos meses tamén se desenvolveron iniciativas dirixidas á mocidade relacionadas coa Intelixencia Artificial e a robótica.
Como inscribirse?
As persoas interesadas poden consultar a programación e formalizar a matrícula a través da páxina web do Concello de Redondela. O prazo de inscrición permanecerá aberto ata o 11 de setembro e os cursos comezarán o 14 de setembro, segundo explicou o concelleiro.
As solicitudes tamén poden tramitarse presencialmente nos puntos habilitados polo Concello. Para resolver dúbidas está dispoñible o correo formacioninformatica@redondela.gal, ademais dos teléfonos de contacto do Concello e das aulas CeMIT.
Cabaleiro anima á veciñanza a aproveitar esta oferta formativa, especialmente nun momento no que as ferramentas dixitais evolucionan a gran velocidade.
