Nun mundo en constante cambio son moitos os proxenitores que non saben como afrontar unha idade tan complexa como é a adolescencia. Así o entenden na Federación de Anpas de Redondela quen decidiron poñer ne marcha unha escola de pais e nais que busca ser un espazo no que reflexionar, comprender e atopar ferramentas para acompañar aos fillos e fillas nesa etapa dun xeito máis saudable e satisfactorio.
José Manuel Lago, presidente da Federación explica que detectaron unha necesidade por parte de pais e nais que precisan dunha orientación para enfrontarse a un momento no que moitos se atopan perdidos á hora de acompañar os cambios que viven os rapaces. “Cambios na pubertade e na adolescencia que cada vez son máis difíciles de entender por parte dos proxenitores que se atopan nun mundo onde as comunicación se fan por internet e onde medran os problemas de saúde mental”.
Con esta escola de pais e nais búscase dar un apoio ás familias “brindar as ferramentas e os apoios necesario para enfrontar os retos educativos nunha sociedade en constante cambio”.
Convocan a todas as persoas interesadas a achegarse a unha actividade que arrancará o luns 23 en horario de tarde no IES Pedro Floriani dende as 18:30 a 20:30. Unha reunión participativa onde se falará de todos os problemas que se viven nas familias con fillos na puberdade e na adolescencia e que será a primeira das oito reunións previstas (as seguintes serán os días: 30 de outubro, 6 e 13 de novembro, 15, 22, 29 de xaneiro e 5 febreiro).
Inscrición no enderezo https://bit.ly/AMPAS.
