Atención personalizada, especial mimo á hora de publicar os seus libros e, sobre todo, apostar por obras de calidade son os elementos distintivos das pequenas editoriais que proliferaron nos últimos anos, e que viven o seu particular esplendor nun sector difícil e marcado pola incerteza. De todo isto falará este venres ás 20:30 horas Enrique Sánchez Sotelo, editor da viguesa Discursiva, nun acto organizado pola Asociación Amigos das Bibliotecas que se vai desenvolver na Casa da Cultura.
Malia a crise que afecta de forma especialmente intensa ao sector cultural, hai quen aposta por poñer en marcha proxectos vinculados co libro, e máis concretamente coa edición. É o caso de Enrique Sánchez Sotelo quen compaxina o seu traballo de profesor e escritor coa súa faceta como editor na editorial viguesa Discursiva. Un proxecto no que se embarcou hai pouco máis de dous anos co obxectivo de dar cabida a textos de calidade pero que por diferentes razóns non chegan ás grandes editoriais. Con especial interese pola poesía teñen publicado tamén libros de ensaio, novela histórica e incluso se teñen embarcado nalgún proxecto de carácter infantil. Sánchez Sotelo salienta a importancia destas pequenas editoriais “porque son a única forma de que autores de obra con moita calidade poidan publicar, sobre todo, unha saída para os autores noveles”. E precisamente iso é o que demanda, que os autores lles envíen os seus textos porque unha das carencias coas que se enfrontan é a de non contar moitas propostas “chégannos moi poucos textos o que non nos deixa moitas opción entre as que escoller”.
Salienta a necesidade de editoriais que dean cabida a autores aínda non consagrados
Non reciben todo o material que desexarían
