O pleno de Redondela aprobaba, nunha sesión extraordinaria celebrada na mañá de hoxe, sumarse á iniciativa da Federación Galega de Municipios e Provincias encamiñada a facilitar aos concellos a posta en marcha dun portal de transparencia. Unha ferramenta que servirá para que os cidadáns teñan acceso directo á información pública, consolidando así os dereitos dos veciños ao dotalos dun sistema de control, coñecemento e vixilancia sobre as actividades e decisións que se adoptan dende a entidade municipal.
O servizo de Novas Tecnoloxías será o encargado de xestionar este portal de transparencia segundo explicou a voceira do PP, Carmen Amoedo quen insistiu que se trata dunha iniciativa encamiñada a mellorar a comunicación cos veciños e dar resposta aos cidadáns “que demandan máis transparencia ás institucións”. A proposta, malia non contar con ningún voto en contra, non estivo exenta de debate. Así, dende o BNG criticaron ao PP por entender que “se trata dunha medida claramente electoralista encamiñada a lavar a cara dun partido afogado polas corruptelas”. O edil Xoán Carlos González engadía que “Os populares vence forzados a tratar estas cuestións pola proximidade electoral e contrarrestar os casos de corrupción que os afogan a nivel autonómico e estatal”. AER tamén amosaba as súas reservas sobre o compromiso do goberno local en canto á transparencia “xa que no anterior mandato trouxemos moitas mocións neste sentido e nunca apoiaron as nosas propostas” explicaba Ricardo Figueroa. Os socialistas pola súa banda entenden que “é irresponsable deixar a xestión deste servizo en mans do departamento de Novas Tecnoloxías” por entender que non teñen capacidade para asumir dito traballo. Amoedo negou rotundamente as críticas. Criticou a González por “empregar una vez máis a demagoxia mesturando peras con mazás ao falar de corrupción cando estamos a piques de poñer en marcha un portal de transparencia”. Negou que existise improvisación á hora de levar este asunto ao pleno “faise por urxencia por una cuestión burocratica” e concluiu afirmando que o “servizo de novas tecnoloxías está perfectamente capacitado para a súa xestión” A proposta aprobouse coas abstencións dos concelleiros de AER e PSOE.