O Multiusos do Piñeiral acolle hoxe ás 19:30 horas unha charla baixo o título “Límites e normas. Educar con responsabilidade” na que se abordarán cuestións tales como a adquisición de hábitos e liberdades por parte dos menores, o perigo da desinformación e as falsas crenzas sobre as drogas ou o papel de pais e nais á hora de establecer normas.
Angeles Montero, coordinadora do programa de prevención Alborada, será a encargada de conducir a charla e aclarar todas aquelas dúbidas que os proxenitores formulen sobre as normas de comportamento, a formación de hábitos ou a adquisición de maior liberdade por parte dos nenos consonte van madurando. Falarase tamén de cando aplicar castigos e como resolver conflitos.
Unha actividade enmarcada dentro do programa que dende a Concellería de Servizos Sociais se está a desenvolver nos diferentes centros educativos do concello encamiñado a previr o consumo de drogas entres os máis novos.
