Hoxe é Martes 24 de Novembro de 2020

O atletismo despunta en Redondela co C.A.R.

RR_Noticias

O club, aínda que de recente creación, xa está a sumar importantes éxitos, como o terceiro posto por equipos na medio maratón Vig-Bay. Algúns dos seus atletas están a competir ao máis alto nivel de Galicia, pero o principal obxectivo do club é seguir fomentando o deporte entre os máis novos e aumentar ano tras ano o número de nenos e nenas nas súas categorías base.

Hai case dous anos que se puxo e marcha a Asociación Deportiva C.A.R. grazas ao empeño dos seus 40 socios, amantes do atletismo. O club naceu co obxectivo de fomentar este deporte no municipio para as persoas “de todas as idades”. Hoxe son case un cento de membros, con 55 socios adultos e 40 nenos nas súas escolas de atletismo, nas que participan rapaces desde os 3 ata os 14 anos. Recentemente lograron o trofeo ao terceiro clasificado por equipos na medio maratón Vig-Bay. Os 22 atletas do club redondelán que participaron conseguiron uns tempos moi meritorios entre os que destacaron Antón Amoedo (1:15:44), Guillermo Pedrero (1:17:56) e Jesús Figueroa (1:19:22). Para o seu presidente, Francisco Otero, trátase dun importante éxito, pero para el o máis importante é seguir fomentando este deporte e ir medrando nas categorías base. Agora están xa a preparar o que será a próxima Carreira Popular de Redondela, en colaboración coa Concellaría de Deportes. No club confían en que se poida celebrar en xuño e superar a participación do pasado ano. Será no percorrido habitual, semiurbano, cunha distancia de 6 quilómetros. A pasada fin de semana a Asociación Deportiva C.A.R. participou tamén no Trail e no Ultratrail do Barbanza, co primeiro posto para Manuel Alejandro Ríos, con Gonzalo Rodríguez e Juan Pablo Figueroa na 5ª e 8ª posición nas súas respectivas categorías. Estes corredores, xunto con Amador Graña, están a despuntar no panorama do atletismo galego.

Francisco Otero presidente
O obxectivo do club é seguir medrando e incorporar máis rapaces á súa canteira.
Carreira Popular de Redondela
A Asociación Deportiva C.A.R. xa está a preparar a cita redondelá co mesmo percorrido de anos anteriores.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *