Hoxe é Martes 28 de Setembro de 2021
History
Stations
NOTHING FOUND!

Banesto pecha a súa oficina en Redondela logo da fusión co Banco Santander

RR_Noticias

O cesamento da actividade está previsto para o próximo 25 de outubro, e afecta á sucursal da rúa José Regojo, xunto con outras 21 oficinas do resto de Galicia. Os clientes da entidade serán atendidos nas dependencias do Banco Santander, na rúa Alfonso XII.

A dirección do Santander comunicou xa aos representantes dos traballadores que, froito da fusión con Banesto, levará a cabo o peche de 22 oficinas na comunidade galega, un cesamento da actividade que está previsto para o próximo 25 de outubro. Segundo a relación de sucursais que baixarán a persiana, o peche afectará á oficina de Banesto en Redondela, xunto coas do Porriño, Baiona, A Guarda, O Grove, Viveiro, Allariz, Sarria, Burela, Sobradelo de Carballeda (Ourense), Ribadeo, Cambre, As Pontes, O Milladoiro (Teo) e Ordes. Trátase de 15 das 22 que prevén clausurar. As outras están nas cidades galegas. Tres en Vigo (nas rúas Pescadores, Coruña e Gran Vía), unha en Pontevedra, outra en Ferrol e dúas na Coruña, segundo os datos que facilitou a entidade aos sindicatos. En Santiago de Compostela, onde Santander e Banesto ocupan dous locais da praza de Galicia, non se prevé polo de agora ningunha reestruturación. Fontes sindicais revelaron que gran parte do axuste de persoal que provoca o peche destas oficinas resolveuse mediante algunha recolocación e, sobre todo, cun proceso de prexubilacións e baixas incentivadas. O pasado 28 de xuño concluíu o período para acollerse ao plan de baixas incentivadas ao que se sumaron xa no conxunto de España uns 300 traballadores. A iso habería que engadir uns 650 que decidiron prexubilarse. O obxectivo do grupo Santander é ter pechadas 700 oficinas a finais do 2014, o que supón adiantar case un ano o plan de reestruturación que estaba previsto tras a fusión con Banesto. O aforro previsto é de 500 millóns de euros ao longo de tres anos.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *