Un emotivo e reivindicativo acto que vai ter lugar este domingo en San Simón organizado pola Iniciativa Galega pola Memoria. Este ano dedicaráselle un recordo especial aos soldados e mariños que desobedeceron aos golpistas e pagaron coa súa vida a lealdade ao pobo e a democracia.
Como todos os anos no domingo máis próximo ao 18 de xullo, conmemórase na Illa de San Simón o día da memoria organizado pola Iniciativa Galega pola Memoria que serve de punto de encontro do movemento memorialístico na Galiza. Neste caso o acto será o 21 de xullo. No acto do domingo, dedicado especialmente aos mariños que desobedeceron aos golpistas está previsto que interveñan parentes de mariñeiros que se resistiron ao levantamento fascista. Este é o caso de Mª José Barreiro, sobriña de Manuel Barreiro, un dos mariñeiros que promoveu a rebelión contra o golpe en Ferrol. David Fernández Martínez, fillo de David Fernández Dopico, mariño de Ferrol exiliado en Orán. E Jorge Gómez Gude, catedrático emérito da Universidade de Vigo, párroco de San Xulián de Marín e fillo de militar represaliado. Intervirá tamén o cantautor marinense Samuel Acuña Parada e levarase a cabo unha solta de pombas en recordo de todas as vítimas do franquismo. A Iniciativa Galega pola Memoria considera fundamental continuar con esta homenaxe que xa está instituída e consolidada no calendario memorialístico galego “neste espazo de dor que serviu de correr da morte ou antesala de represión nos anos que foi colonia penitenciaria do franquismo”.
Nesta edición lémbrase especialmente aos soldados que se mantiveron leais á República
