Hoxe é Martes 27 de Outubro de 2020

AER solicita que se convoque mensualmente a Comisión de Seguimento de Servizos Privatizados

RR_Noticias

A Agrupación de Electores denuncia que se están a dar casos de incumprimentos nos contratos coas empresas concesionarias, polo que esixen que convoque esta comisión mensualmente mentres continúen as irregularidades. Tamén solicitan a comparecencia do alcalde, Javier Bas, para explicar a postura do Concello no xuízo contra a cementeira situada en Vilar de Infesta.

O pleno ordinario do mes de xaneiro está convocado para mañá xoves, día 31 de xaneiro, ás 20.00 horas no Concello, unha sesión na que AER presenta varias mocións e comparecencias. A primeira delas é a do alcalde con motivo do aprazamento do xuízo contra o dono da cementeira de Vilar, previsto para o pasado 23 de xaneiro, e que por segunda vez se apraza pola imposibilidade de que un dos citados a declarar se presentase por residir actualmente en Brasil. O edil Jorge Varela “Chopi”, denuncia que se trata dunha “burla” que está a pospoñer o xuízo contra unha empresa que non cumpre coa normativa, carece de licencia e que reiteradamente rompeu os precintos instalados pola Policía Local para impedir a súa actividade. No pleno de mañá demandan que o rexedor, Javier Bas, explique a postura do Concello como parte demandante neste proceso. A Agrupación de Electores de Redondela tamén presenta unha moción na que solicita que se convoque mensualmente a Comisión de Seguimento de Servizos Privatizados. Neste caso denuncian que hai xa sete meses que non se celebra unha xuntanza, cando existen empresas concesionarias “que non están a cumprir co establecido nos pregos de condicións”. Apuntan o caso de Urbaser, encargada da recollida do lixo, que incumpre a obrigatoriedade de instalar un Punto Limpo en Redondela. Por outra banda demandan que Urbaser xustifique as toneladas de lixo recollido no municipio e polas que cobra, xa que as cantidades non se modificaron nos últimos anos. Outro caso que tamén queren analizar na comisión é o de Serviocio, que xestiona a Piscina Municipal de Redondela, xa que houbo varias queixas de usuarios polos prezos dalgúns cursos e por avarías nas duchas. A ampliación da AP-9 ao seu paso por Chapela é outra das cuestións que AER leva ó pleno de mañá. Na moción solicitan que se inicie o expediente para a declaración de Ben de Interese Cultural (BIC) dos restos da Fortaleza de Rande, así como o “Cargadeiro do Alemán”, o xacemento arqueolóxico dos Pecios da Batalla e do Contorno de Rande. Entende que a ampliación da autoestrada é unha “barbarie” que suporía un dano “irreversible” ao patrimonio histórico de Rande.  

Jorge Varela AER
Na comparecencia do alcalde piden que explique a postura do Concello no xuizo contra a cementeira de Vilar.
Comisión de Servizos Privatizados
AER solicita reunións mensuais mentres non se arranxen as irregularidades das empresas concesionarias.
Ampliación AP-9
AER rexeita a ampliación e solicita que a zona da fortaleza de Rande sexa declarada BIC.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *