Hoxe é Sábado 31 de Outubro de 2020

Uns 5.000 escolares de toda Galicia visitarán durante este curso a illa de San Simón

RR_Noticias

As viaxes están organizadas pola empresa Marisma Events, en colaboración con Renfe e a navieira Nabia. Os alumnos, de Primaria e Secundaria, terán a ocasión de facer actividades de ocio na illa, coñecer os polígonos de bateas da enseada e tamén o escenario da Batalla de Rande.

O programa foi presentado onte no Concello de Redondela, e está incluído nas viaxes escolares que ofrece Renfe por toda Galicia. Os alumnos chegarán á vila en tren, e logo serán trasladados en barco ata a illa. Desde a empresa Marisma Events agardan que uns 5.000 escolares de toda a comunidade visiten a illa dentro deste programa, o que permitirá “desestacionalizar” as visitas a este enclave turístico. O concelleiro de Cultura de Redondela, Alberto Pazos, destacou a importancia desta iniciativa, que permitirá ós rapaces coñecer “o patrimonio natural, histórico e cultural da zona”. A concelleira de Educación, Teresa París, salientou que esta iniciativa ven a completar a oferta do pasado curso, e ofrece interesantes actividades de convivencia para os escolares. A visita á illa terá unha duración de catro horas, nas que os alumnos farán actividades de ocio e educativas, organizadas por Plus Sports. A excursión tamén inclúe un percorrido en barco dunha hora pola ría que terá unha parada no estreito de Rande, onde os rapaces poderán coñecer máis datos da histórica batalla naval. O barco tamén percorrerá os polígonos de bateas da ría, onde os escolares poderán coñecer como se cultiva o mexillón. Tamén se estuda ampliar a iniciativa ao Centro de Interpretación da Batalla de Rande cando entre en funcionamento, previsto para a próxima primavera.    

Alberto Pazos edil de Cultura
O concelleiro entende que se trata dunha excelente iniciativa para coñecer Redondela e a enseada.
Teresa París edil de Ensino
A concelleira anima ós centros escolares de Redondela a participar na actividade.
Marisma Events
Os promotores pretenden ampliar a oferta turística da illa a todo o ano.
Plus Sports
A empresa de ocio organizará na illa actividades lúdicas para os rapaces.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *