Hoxe é Venres 24 de Setembro de 2021
History
Stations
NOTHING FOUND!

Fin de semana de mitins do PP, BNG e AGE

RR_Noticias

A popular Soraya Sáenz de Santamaría fará campaña en Redondela o sábado. O BNG celebra esta tarde un mitin en Trasmañó, o sábado estarán en Negros e o domingo en Ventosela e Reboreda. Alternativa Galega de Esquerdas celebra o venres o acto central no Multiusos da Xunqueira, e na fin de semana percorrerán Vilar, Saxamonde, Trasmañó e Reboreda.

Os próximos comicios autonómicos do 21 de outubro deixan estes días en Redondela varios encontros das formacións políticas co electorado. Unha das bazas dos populares será a “número dous” do goberno de Mariano Rajoy, Soraya Sáenz de Santamaría, que estará o sábado, día 13, no Convento de Vilavella. Será ás 19.30 nun acto para o que o acceso será con invitación, e no que intervirá tamén o candidato redondelán Alberto Pazos.
O BNG arranca a longa fin de semana cun mitin esta mesma tarde, ás 20.00 horas, en Trasmañó. Nel intervirá a candidata Cecilia Pérez e o concelleiro Xoán Carlos González. O sábado reuniranse cos veciños no Centro Cultural de Negros, ás 19.00 horas. O domingo a cita é dobre, cun encontro no Centro Cultural de Ventosela ás 12.30 e outro na Sociedade Labrego Cultural de Reboreda ás 19.30 horas. O pasado luns foi o cabeza de lista do BNG por Pontevedra o protagonista do mitin no Multiusos da Xunqueira. Carlos Aymerich afirmou que o BNG “acredita nos sectores produtivos e no futuro da Galicia”. Ademais da defensa de sectores produtivos “estratéxicos” , como o agrogandeiro, forestal e o vinculado co mar, Aymerich destacou a necesidade de impulsar “o sector industrial”, principalmente nunha comarca como a de Vigo.
A formación Alternativa Galega de Esquerda, coalición formada por Anova e Esquerda Unida, celebra un mitin central o venres, día 12, ás 20:00 horas no Multiusos da Xunqueira. Intervirán os cabezas de lista Juan Fajardo e Chelo Martínez e os redondeláns Quino Vilas e Paulo Jablonski. Na fin de semana percorrerán varias parroquias. O sábado estarán no Centro Cultural de Vilar ás 18.00 horas, e ás 20.00 no Centro Cultural de Saxamonde e no de Trasmañó. O domingo, ás 12.30 horas, manterán un encontro cos veciños na Sociedade Labrego Cultural de Reboreda.
O PSOE non ten previsto ningún acto de campaña para esta fin de semana, aínda que a organización local do partido prepara un mitin para a próxima semana no que adiantan que haberá algún “peso pesado” do partido socialista.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *