O vindeiro sábado 20 de setembro, as rúas de Redondela transformaranse nunha gran pista de atletismo coa celebración da V Carreira Popular Infantil e a IV Carreira Contrarreloxo por Equipos, organizada polo Concello de Redondela e a Asociación Deportiva CAR. Ambas probas, que prometen encher a vila de deportistas e familias, terán lugar na mesma xornada, unha novidade deste ano que busca crear un ambiente festivo e fomentar a participación interxeracional.
Carreira Infantil: deporte para os máis cativos
A partir das 18:00 horas, a Alameda de Castelao acollerá a V Carreira Popular Infantil, destinada a nenos e nenas nados entre 2010 e 2023. As distancias variarán segundo as idades, desde os 50 metros para os máis pequenos ata os 1.500 metros para os maiores. “As distancias mantéñense similares ás de anos anteriores porque, coa experiencia, consideramos que son as axeitadas para cada idade”, explica Ana Romasanta, presidenta da Asociación CAR. Como novidade, as categorías de pitufos, sub-8 e sub-10 correrán na Alameda de Castelao, mentres que as categorías sub-12, sub-14 e sub-16 farano pola rúa Alfonso XII, o que dará un toque máis vistoso á proba. Ademais, suprimiuse a categoría sub-18 para permitir que estes corredores participen na Contrarreloxo por Equipos, unha demanda dos propios atletas que xa non se consideran “tan pequenos”.
Todos os participantes recibirán medallas, e as categorías sub-12, sub-14 e sub-16 tamén optarán a trofeos. “O obxectivo principal é transmitir valores como o traballo en equipo, o respecto e o gozo polo deporte. É unha alegría ver aos cativos, algúns de só dous anos, correndo acompañados das súas familias. Esta proba fomenta o achegamento interxeracional e o amor polo deporte”, destaca Romasanta.
Contrarreloxo por Equipos: un formato único
Ás 20:00 horas, a vila acollerá a IV Carreira Contrarreloxo por Equipos, un evento que destaca polo seu formato pouco habitual. Os equipos, formados por entre 4 e 6 compoñentes, deberán completar un percorrido de 5 quilómetros que comeza no centro de Redondela e remata fronte á Casa do Concello. No caso dos equipos mixtos, un mínimo de dous membros deberán ser do xénero oposto. “É unha carreira diferente, case única en Galicia. Só coñecemos unha proba similar na zona do Berbés, en Vigo. Aquí, os equipos saen cada minuto e deben chegar á meta con polo menos catro compoñentes xuntos. Isto fomenta o espírito de equipo, porque non se trata só de correr individualmente”, explica a presidenta do CAR.
Inscricións e participación
O prazo de inscrición para ambas probas remata o mércores 17 de setembro ás 00:00 horas. A carreira infantil xa conta con 200 inscritos, unha cifra que enche de satisfacción á organización, aínda que na Contrarreloxo por Equipos as inscricións son algo menores que en anos anteriores debido á coincidencia con outras probas en Cangas, Pontecaldelas e O Porriño. “É difícil cadrar os calendarios, pero confiamos en que haxa un aumento de última hora”, sinala Romasanta. A inscrición para a Contrarreloxo ten un custo de 8,50 euros, que inclúe os gastos de xestión, e pode realizarse a través das redes socias do club ou CRONOTEC. Non hai límite de prazas, e entre os inscritos hai corredores de Redondela, Vigo, Marín, A Estrada e mesmo Santiago de Compostela, o que, segundo a presidenta, “é moi importante para dar a coñecer a nosa vila e dinamizar a hostalaría local”.
A organización traballa en coordinación con Protección Civil, a Policía Local e o Concello de Redondela para garantir a seguridade durante o evento. “A seguridade é unha prioridade para nós, a pesar dos desafíos que supón un evento desta magnitude”, subliña Romasanta. Ademais, o club contará cun equipo de voluntarios e aproveitará a xornada para abrir un posto de inscricións para novas incorporacións á Asociación CAR.
A xornada coincidirá co XIII aniversario da Asociación CAR, e a celebración pecharase cunha festa tras a Contrarreloxo por Equipos. Como novidade, haberá un cortador de xamón, cortesía de Talleres Ponteseca, e cervexas do Grupo Damm (Keler), xunto co avituallamento habitual para os participantes. A organización agradece o apoio dos patrocinadores, especialmente a Rodavigo, “sempre moi implicado co deporte redondelán”, así como ao Grupo Lirón, Decoraciones Barciela, Hobbybike e Podoloxía Integral Tania Carballo Guimeráns. “Sen o Concello e os patrocinadores, este evento non sería posible”, recoñece Romasanta.
A presidenta da Asociación CAR resume o espírito da xornada: “Queremos que sexa unha tarde en familia, onde todos, desde os máis pequenos ata os adultos, poidan gozar do deporte e dos valores que promove, como o traballo en equipo e o respecto. É unha oportunidade para encher as rúas de Redondela de vida e crear un ambiente festivo”. Con esta combinación de competición, festa e convivencia, Redondela prepárase para unha tarde inesquecible que unirá deporte, comunidade e celebración.
