A réplica do histórico bote Manuel está xa rematada. A embarcación foi realizada polo alumnado do obradoiro de emprego “Polo mar de Redondela” que se desenvolveu nos úlitmos meses en Pousadouro e que permitiu construír unha réplica navegable da gamela que salvou a centos de xudeos que escapaban do nazismo. A presentación do novo bote tivo lugar na clausura dos obradoiros de Carpinteiría de Ribeira e Forestal-Xardinería e agricultura ecolóxica nos que se formaron vinte persoas.
O “novo Manuel” é unha réplica do bote de Faustino Otero Lino unha embarcación cargada de historia e de simbolismo, xa que posibilitou que centos de xudeus fuxidos dos nazis salvaran a vida e axudou tamén a mellorar as condicións de vida dos presos de San Simón servindo de enlace entre os prisioneiros e as súas familias.
A historia da embarción orixinal remóntase a finais da década dos anos 30 do século pasado, cando é construído por encargo de Faustino Otero Lino nunha carpintería de Ribeira en San Adrián de Cobres para o seu uso en labores de pesca e transporte de mercadurías pero acabaría convertíndose no bote da esperanza para aqueles xudeus que chegaban a ría nun intento de salvar as súas vidas.
Nos últimos meses o alumnado da especiaidade de Carpinteiría de Ribeira traballaron para relizar unha réplica navegable da embarcación orixinal. Un alumnado que xunto cos seus compañeiros e compañeiras de “Forestal-Xardinería e Agricultura Ecolóxica” recibiron os seus Certificados de Profesionalidade nun acto no que participou a alcaldesa, Digna Rivas, o concelleiro de Emprego, Antonio Cabaleiro, a Delegada da Xunta, Ana Ortiz, o Director Territorial de Emprego, José Antonio Rodríguez, e a Directora do Obradoiro, Imelda Barrio.
No caso do alumnado de Carpintería de Ribeira, os participantes ademais de crear a réplica exacta do bote Manuel, formáronse noutros traballos de carpintería, e encargáronse da colocación de contras nas Casas dos Mestres e nova tarima no Multiúsos de Chapela.
Os alumnos-traballadores da modalidade de Forestal-Xardinería e Agricultura Ecolóxica realizaron traballos como a renovación e conservación de rotondas, os xardíns de Regojo e a Xunqueira e tarefas forestais como a roza da zona arqueolóxica de Monte Penide e a súa labor na horta ecolóxica permitiu doar ao Banco de Alimentos máis de 1.500 quilos de produtos frescos ao longo do curso.
Desde o Concello a alcaldesa e o edil de Emprego desexáronlle “o mellor” no seu futuro laboral, e fixeron un chamamento ás empresas destes sectores para que teñan en conta que se precisan facer contratacións “aquí poden contar con persoal moi cualificado”.
