A Garda Civil desarticulou o grupo criminal ao que atribúe o violento atraco cometido o pasado 19 de maio nunha sucursal bancaria da parroquia de Moscoso, no municipio de Pazos de Borbén, no marco da operación Oitavén. A investigación permitiu a detención de tres persoas, dúas delas de 36 anos e unha terceira de 59 anos, veciñas de Redondela e Pazos de Borbén.
Segundo informou o instituto armado, o asalto produciuse pouco antes do peche da entidade, arredor das 14.00 horas. Dous dos sospeitosos accederon á oficina ocultando a súa identidade mediante pelucas e outras prendas de vestir. Un deles portaba unha arma de fogo e o outro un coitelo de grandes dimensións.
Os asaltantes reduciron e maniataron con bridas unha empregada da sucursal e un cliente que se atopaba utilizando o caixeiro automático, obrigándoos a permanecer inmobilizados nun despacho para evitar que fosen vistos desde o exterior. Durante varios minutos agardaron a apertura retardada da caixa forte e do caixeiro automático, nun episodio que, segundo a Garda Civil, estivo marcado pola tensión e polas ameazas exercidas polos atracadores.
Unha vez obtido o acceso ao diñeiro, os autores lograron apoderarse de máis de 57.000 euros. Tras consumar o roubo abandonaron a oficina simulando ser clientes e fuxiron nun vehículo que posteriormente apareceu calcinado nas inmediacións das vías do tren da parroquia de Tomeza, en Pontevedra.
As primeiras pescudas orientaron a investigación cara a varios individuos con amplos antecedentes, especialmente roubos con violencia e intimidación e atracos a entidades bancarias.
A Garda Civil relaciona ademais un dos detidos con outros feitos recentes, entre eles o asalto con arma de fogo a un estanco de Redondela e un episodio ocorrido o pasado 5 de xuño na parroquia viguesa de Candeán, onde un vehículo implicado nunha persecución policial acabou colidindo cun coche da Policía Local, causando feridas a dous axentes.
As detencións leváronse a cabo os días 16 e 17 de xuño en Redondela e Vigo. Nos rexistros domiciliarios practicados en vivendas de Redondela e Pazos de Borbén, os axentes interviñeron diversas pezas de roupa presuntamente utilizadas durante o atraco, diñeiro en efectivo e munición compatible cunha arma de fogo.
Aos tres arrestados atribúenselles provisionalmente os delitos de roubo con violencia e intimidación, pertenza a grupo criminal, detención ilegal, tenza ilícita de armas e un delito contra a seguridade viaria.
Os detidos foron postos a disposición xudicial o pasado 18 de xuño. A autoridade xudicial decretou o ingreso en prisión provisional de dous deles, mentres que o terceiro quedou en liberdade á espera de novas actuacións. A investigación está dirixida pola Sección Civil e de Instrución do Tribunal de Instancia de Redondela e coordinada coa Fiscalía de Vigo.
