Hoxe é Sábado 16 de Outubro de 2021
History
Stations
NOTHING FOUND!

A Xunta require ao Concello que paralice a limpeza mecánica e extracción de algas da praia

retirada de algas en Cesantes

Medio Ambiente advírtelle, segundo explican dende AER, de que “no caso de non atender este requerimento daráselle traslado ao servizo xurídico co fin de que sexa incoado o expediente sancionador que proceda”. A Agrupación de Electores asegura que o informe lles da a razón logo de que a formación presentara unha denuncia ante Xefatura Territorial da Consellería de Medio Ambiente polos métodos “agresivos” de limpeza das algas que supoñían a “destrución do sistema intermareal”.

AER mostra o súa satisfacción “xa que o informe avala o método de limpeza de praias empregado pola agrupación durante os dous anos que formou parte do goberno de Redondela”.

A Agrupación de Electores presentara unha denuncia ante a Dirección de Cambio Climático da Xunta de Galicia por entender que os medios de limpeza empregados polo equipo da alcaldesa en Cesantes e A Punta, unha vez que se lles retirou a competencia nesta área, eran contrarios aos contemplados nestes areais do municipio, pertencentes á Rede Natura 2000. Aseguran que unha vez en mans do PSOE procedeuse a “facer unha retirada total de algas con maquinaria en zonas non permitidas legalmente nunha zona protexida”.

Neste sentido apuntan que o uso da maquinaria pesada ten que contar cunha “autorización expresa do organismo autónomo competente en materia de Conservación da Natureza” e baixo unhas circusntancias moi precisas como cando a “gran cantidade de argazos acumulados e restos doutros tipos así o aconsellen e cuxa retirada manual sexa especialmente custosa ou gravosa para as administracións” ou “tralo paso dun temporal” e, en todo caso, ““non se autoriza o emprego de pala escavadora, ou similar”. Ante todo isto, o informe conclúe que “neste servizo provincial non consta que o Concello de Redondela teña solicitada autorización para introducir maquinaria pesada nas praias de Cesantes e A Punta, nin para a retirada de algas da zona intermareal”.

AER lembra que, mentres estiveron no goberno, respectaron escrupulosamente a lexislación e as medidas indicadas no informe da Consellería de Medio Ambiente e que foi o actual goberno redondelán en minoría quen as rompeu durante a época estival.

“Como agrupación política na oposición, AER denunciará as veces que sexan necesarias prácticas contrarias á norma por parte do goberno de Digna Rivas, e seguirá traballando no seu compromiso por Redondela” conclúe a formación.

Dende o Concello aseguran que as algas sempre se recolleron de xeito manual, tanto antes como despois do traspaso de competencias da Concellería de Medio Ambiente a Medio Mariño e negaron que se tiveran usado escavadoras nas praias. Dende a alcaldía insisten en que “os medios utilizados son exactamente os mesmos, co mesmo método de traballo e a mesma maquinaria que xa entón se utilizaba por parte da Concellería que dirixía Roberto Villar”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *