Hoxe é Venres 23 de Xullo de 2021

O BNG demanda en Chapela pantallas acústicas “adaptadas ao entorno”

PantallasBNG

A través de diversas iniciativas presentadas polo deputado nacionalista, Néstor Rego, o BNG pretende coñecer os pormenores da obra de instalación de pantallas acústicas na AP-9 ao seu paso por Chapela. Hai anos que existe o compromiso do goberno central para instalar estas barreiras co obxectivo de mitigar o “ruído enxordecedor” que provoca o tráfico da autoestrada. O grupo nacionalista demanda “celeridade na obra” para reducir esta contaminación acústica que padecen os veciños desde hai décadas. Outra preocupación do BNG é “como se van construír esas pantallas”. O concelleiro Xoán Carlos González advirten que a información da que dispoñen “non é nada alentadora”. Sinala que nunha xuntanza da alcaldesa, Digna Rivas, coa comunidade educativa do IES Chapela, a rexedora afirmou que as pantallas acústicas construiríanse de formigón, opción que rexeitan dende os colectivos veciñais e tamén dende o BNG. “Non imos quedar de brazos cruzados mentres se volve a agredir á parroquia”, sinala González. Alerta que esta opción crearía “un enorme balado no medio e medio da parroquia cun impacto moi negativo”. Sospeita o edil que, como sucedeu co Proxecto de Reposición de Vías, o proceso de alegacións se abra en pleno mes de xullo e agosto “co que a resposta política e veciñal vese enormemente mermada”.

Para coñecer os detalles do proxecto o deputado Néstor Rego presentou varias preguntas por escrito no Congreso, xunto cunha Proposición non de Lei para ser debatida na Comisión de Transportes, Mobilidade e Axenda Urbana. O obxectivo desta proposta é comprometer ao Ministerio para que os elementos que se instalen como barreiras acústicas na AP-9 “sexan máis respectuosos co noso medio e coa veciñanza de Chapela”, explica González. Outra das cuestións que propón o BNG é que o proxecto recolla tamén a instalación de pantallas acústicas na avenida de Redondela “entre o CEIP Alexandre Bóveda e o Alto da Encarnación”. Entenden que as compensacións do Ministerio de Mobilidade pola ampliación de AP-9 debe redundar directamente “na mellora da calidade de vida da veciñanza de Chapela, instalando pantallas acústicas adaptadas ao entorno”.

Niveis de ruído por riba do máximo permitido

O elevado nivel de ruído que provoca o tráfico da AP-9 xera incomodidade e mesmo problemas de saúde aos residentes da zona. O pasado 4 de xuño o IES Chapela saíu á rúa para esixir a instalación das pantallas acústicas “xa”, logo de anos de “promesas incumpridas”. O alumnado do centro debe soportar un volume de ruído por riba dos 65 dB, incumprindo a lexislación que marca un máximo de 55 dB. Esta situación provoca “tensión e cansazo no alumnado, e baixa o seu rendemento académico”, tal como explican desde a dirección do centro. A mobilización foi apoiada tamén polos colectivos veciñais de Chapela, Trasmañó e Teis, e tamén por todos os grupos políticos con representación no Concello de Redondela.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *