Hoxe é Martes 24 de Novembro de 2020

Redondela réndese ao escritor Diego San José

RR_Noticias

Un auditorio da Xunqueira cheo era o escenario no que a familia do escritor madrileño recibía o recoñecemento de Fillo Adoptivo. Un acto no que se lembrou a súa importancia literaria cunha ampla obra xornalística e narrativa pero tamén o seu amor pola Vila dos Viadutos, que supuxo un rexurdir para o escritor logo de pasar preto de catro anos no penal de San Simón polo seu apoio á república e á causa democrática.

O escritor Juán Manuel de Prada lembraba que Diego San José (Madrid 1884-Redondela 1962) foi un “home ao que lle perseguiu o infortunio pero que soubo convertelo en escola de vida e transformalo en beleza na súa obra”. Palabras de lembranza e homenaxe que se escoitaron este venres no acto de entrega á familia do escritor do título que o acredita como Fillo Adoptivo de Redondela e no que o presidente da Fundación Penzol, Manuel Puga, lembraba como a través do mestre Reveriano Soutullo, San José entrou por primeira vez en contacto con Redondela. Unha terra que visitaría todos os veráns e que o “engaiolou” até o punto de levar o seu nome á prensa madrileña. A morte de dúas das súas fillas e a Guerra Civil rematarían coas súas visitas a Redondela onde só regresaría anos despois en condición moi diferente, como represaliado, condenado a morte e con destino o penal da Illa de San Simón. A pena máxima non se cumpriría e finalmente, San José, quedaría en liberdade condicional no ano 1944. Manuel Puga lembraba como o autor non se rendeu nunca e seguiu escribindo na prensa local, primeiro baixo un pseudónimo logo coa súa sinatura. O escritor refaría a súa vida en Redondela, coa axuda de Ernestina Otero e José Regojo, e non tardou en formar parte activa da vida social e cultural da vila, até o seu falecemento en 1962. Nesta acollida facía fincapé a filla do autor, María del Carmen San José, a intervención máis emotiva, que agradecía o recoñecemento ao seu pai e lembraba como Redondela e os seus veciños acolleron a Diego San José e a súa familia nun dos momentos máis difíciles da súa vida sendo aquí onde rexurdiría logo de pasar preto de catro anos encarcerado. Un acto no que se gabou a ampla obra escrita do autor, dende a faceta xornalística, narrativa ou histórica. Un escritor, que como destacaba Manuel de Prada, tiña unha gran habilidade para todos os xéneros e a través da escritura enfrontouse á dor. Un recoñecemento que contou “cun sentir social amplamente admitido”, en palabras do alcalde de Redondela, Javir Bas, que destacaba a unanimidade que suscitou esta distinción non só entre o pleno da corporación, que aprobaba por unanimidade esta distinción o 29 de novembro de 2018, senón tamén de distintos colectivos e asociacións, entre eles os dezaseis colectivos locais que promoveron este recoñecemento. A filla do escritor era a encarga de recoller o título de Fillo Adoptivo, nun acto que estivo amenizado pola música de Reveriano Soutullo interpretada polo pianista Alejo Amoedo e a coral Voces Graves e que remataba coa descuberta dunha placa na rúa Afonso XII, onde residira Diego San José.  

Alcalde Javier Bas
Bas lembraba a unanimidade que suscitou o nome de Diego San José para ser proposto como Fillo Adoptivo
Filla Diego San José
María del Carmen San José agradecía a distinción e lembraba o papel que xogou Redondela na vida do seu pai e de toda a familia
Manuel Puga pte Fundación Penzol
Puga foi un dos promotores deste recoñecemento e lembraba o vínculo do escritor madrileño coa vila
Escritor Juán Manuel de Prada
A extensa traxectoria de San José foi lembrada polo excritor quen fixo fincapé na súa versatilidade

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *