O redondelá de adopción, Seso Durán, leva na escena musical desde os anos 90. Foi integrante e compositor no grupo folk Liorna e tras 10 anos afastado dos escenarios, nos que centrou a súa actividade profesional na docencia da música, en 2017 debutou en solitario co disco Son da Memoria.
O primeiro disco falaba dos estragos da Guerra Civil en Galicia. Agora presenta “Ascensión”, un traballo que supón a súa consolidación como músico en solitario e que fala da súa perspectiva da sociedade actual. Un cambio de paradigma, pois o seu primeiro disco falaba do pasado e agora decantase por falar do presente de forma íntima intimista e cargada de sentimento. Trata temas como o cambio climático ou a crise social que provocan as redes sociais e a tecnoloxía.
