A Consellería de Cultura ofrece a autores e autoras unha experiencia única, unha bolsa de residencia literaria na illa de San Simón. O obxectivo é “apoiar a creación literaria dunha ducia de persoas fornecéndolles unhas condicións idóneas para o proceso”. As estadías terán unha duración mínima de 15 días e máxima dun mes e desenvolveranse entre setembro e novembro. O director Xeral de Cultura, Anxo Lorenzo, explica que se trata de fomentar a creación literaria e todo o que ten que ver co mundo do libro, como é a ilustración.
A bolsa está dirixida a persoas que participen nun proxecto creativo en lingua galega no ámbito da escritura, tradución, deseño gráfico ou ilustración. Os autores seleccionados poderán facer a súa estadía na illa, un lugar emblemático da Ría de Vigo, que polas súas características, historia e natureza é un espazo moi axeitado para o traballo creativo.
O prazo de presentación de solicitudes estará aberto ata o 7 de setembro. As persoas que desexen participar nesta convocatoria deberán presentar unha única candidatura acompañada dun documento que deberá incluír a explicación do proxecto de creación literaria que desenvolverá na residencia, xénero, idioma da obra, currículo do aspirante, expediente artístico e carta de motivación, entre outros detalles.
Toda a información pode consultarse no DOG, que onte luns publicou as bases da convocatoria.
