A Alameda de Redondela volveu encherse hoxe das tradicionais figuras dos Maios nunha festa que renacía tras dous anos de ausencia. Moitos maios tradicionais, principalmente conos e algún cruceiro, foron os protagonistas nun día no que tamén houbo alguna aposta artística como a Lavandeira que se levou o primeiro premio nesta categoría. A retranca tradicional das coplas escoitouse nun escenario que estes días serve tamén para albergar as diferentes propostas festivas que nos deixa a Festa do Choco, que se prologará ata o vindeiro 8 de maio.
Un total de 19 figuras vexetais protagonizaron o regreso dos Maios a rúa, nunha mañá no que o tempo acompañou e animou a moitos a achegarse ao centro da vila neste primeiro día do mes. Unha das figuras que máis sorprendeu pola súa orixinalidade e complexidade foi a da Lavandeira, unha composición articulada que movía os brazos e que se fixo merecedora do primeiro premio en maio artístico, seguido dun conxunto de instrumentos cunha gaita, un tambor e un tamboril e, en terceiro lugar, a figura dun choco recreada pola Anpa do colexio de Cedeira.
Con todo, foron os maios tradicionais os máis abundantes, principalmente conos de diversos tamaños cos adornos habituais de ovo, laranxa e flores.
Non faltou a retranca das coplas que nenos e nenas interpretaron sobre o escenario e onde se escoitaron moitas referencias políticas, con protagonismo local e moitas alusións a unha pandemias e unhas máscaras que aínda non están esquecidas.
Mellores coplas
As Choqueiras
Os Quintelas
Que crus
Mellor Interpretación
Os nenos de Saxamonde
O Carballo 2022
A lavandeira
Maio Artístico
A lavandeira
Os Quintelas
O Choco Tinteiro
Maio Tradicional
O Cono de Quintela
O Carballo 2022
Case non chegamos
