Hoxe é Domingo 19 de Setembro de 2021
History
Stations
NOTHING FOUND!

Protesta contra Aucosa por terra e mar

AucosaManiPancarta

Ao berro de “Aucosa, fóra da ría!” unhas 300 persoas manifestáronse este mediodía no acceso á factoría de Cabanas. Convocados por colectivos veciñais, plataformas en defensa da ría e pescadores, os manifestantes esixiron unha vez máis a paralización da actividade da auxiliar conserveira. Á protesta sumáronse unha vintena de embarcacións que fixeron unha mobilización por mar. A Comisión Veciñal de Cabanas, Rande, Chapela e Redondela leva anos denunciando os incumprimentos de Aucosa en materia ambiental e urbanística. Advirten que a auxiliar conserveira, que fabrica fariñas e aceites de peixe, provoca fortes cheiros que afectan “á calidade de vida e á saúde dos veciños” e tamén verquidos na ría “que contaminan un patrimonio natural que é de todos”. Na lectura do manifesto a veciñanza afirma que as recentes obras de reforma acometidas pola empresa “non serviron para eliminar os malos cheiros” e que Aucosa debe trasladarse a un lugar axeitado “onde non atente contra os dereitos humanos”.

Na lectura do manifesto os veciños esixiron o traslado de Aucosa fóra da ría

Veciños como Jose Luis padecen a diario os malos cheiros de Aucosa, que tamén afectan a outras zonas “segundo como sopre o vento”, xa que onte chegaban “ata o multiusos do Piñeiral en Chapela”. Por outra banda os verquidos á ría “afectan aos bancos marisqueiros, e especies como a navalla desapareceron”. Non comprenden como a Xunta de Galicia permite esta actividade contaminante “en plena zona de protección da Rede Natura” e esixen que se traslade “a un polígono industrial”.

Os veciños aseguran que as reformas acometidas na factoría non reduciron a contaminación

Levan décadas “aguantando uns cheiros insoportables” e facendo denuncias na policía “a diario”. Javier, que leva máis de 20 anos vivindo na zona asegura que están a sufrir moito e que así “non se pode vivir”.

Os afectados realizan denuncias a diario polos malos cheiros e os verquidos de Aucosa

Tamén representantes políticos de PsdG-PSOE, AER e BNG participaron na concentración. A deputada nacionalista Alexandra Fernández lembrou que o BNG solicitou á Xunta de Galicia “que revise de oficio a autorización ambiental de Aucosa”. Entende que os incumprimentos da fábrica en materia ambiental e urbanística son motivos “máis que de sobra” para actuar. Sinala que os cheiros que provoca Aucosa, xunto cos verquidos á ría e a instalación dunha planta de gas licuado son incumprimentos reiterados da normativa.

Alexandra Fernández, deputada do BNG

O concelleiro Roberto Villar, responsable de Medio Ambiente, apuntou tamén á responsabilidade da Xunta de Galicia por permitir que Aucosa continúe coa súa actividade na ría. Sinala que a petición dos veciños e do goberno local non é que se peche a fábrica, senón que se traslade a unha zona industrial.

Roberto Villar, concelleiro de Medio Ambiente de Redondela

Tamén a alcaldesa, Digna Rivas, asistiu á mobilización en apoio aos veciños, e advertiu que o goberno local “seguirá pelexando e esixindo á Xunta que asuma as súas responsabilidades neste asunto”.

Digna Rivas, alcaldesa de Redondela

Rivas sinala que nun entorno natural privilexiado como é a Enseada de San Simón”non se pode permitir a actividade dunha empresa contaminante”.

Unha vintena de embarcación participaron na protesta por mar
Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *