Hoxe é Mércores 4 de Agosto de 2021

O Colectivo Republicano rende homenaxe ás mulleres represaliadas

dav

As mulleres padeceron, durante a guerra e a ditadura franquista, unha dobre represión “xa que á súa ideoloxía engadíase o feito de seren discriminadas por ser mulleres”. Co obxectivo de facer xustiza á memoria das mulleres “silenciadas” o Colectivo Republicano de Redondela celebra o seu 20º aniversario rendéndolles unha homenaxe. Dúas exposicións e un documental repasan as súas vidas “invisibilizadas” pola historia. Marco Santos “Lareira” explica que queren así recoñecer “o papel das mulleres na loita polas liberdades”.

Marco Santos “Lareira”, do Colectivo Republicano de Redondela

No Multiúsos da Xunqueira pode visitarse a mostra “Rexas, mulleres baixo o terror franquista”, unha exposición que recolle a memoria das vítimas do golpe de Estado de 1936 coas historias de represión sufridas por 172 pontevedresas que foron perseguidas, asasinadas, encarceradas e, ademais, polo feito da súa condición de mulleres, soportaron tamén vexacións de corte sexista. A esta mostra da Deputación de Pontevedra, o Colectivo Republicano de Redondela engadiulle tamén historias redondelás das “madriñas” de San Simón, da loita das mariscadoras do ano 68, ou as mobilizacións contra o peche da fábrica téxtil de Regojo.

A mostra “Rexas” complétase con historias de mulleres redondelás

A segunda exposición, obra de Ruth Rodríguez é “A ditadura do patriarcado”. A artista redondelá reflexiona sobre a muller e o feminismo con fotografías, montaxes e composicións que lembran ás “lavandeiras” de San Simón ou a mulleres como Emilia Cabaleiro, represaliada polo franquismo.
Tamén pode visionarse o documental “Matriarcas”, que conta en primeira persoa a experiencia traumática vivida por cinco mulleres vítimas do acoso da ditadura. A xornalista e escritora Montse Fajardo, comisaria da mostra “Rexas”, participará na inauguración organizada polo Colectivo Republicano. Será o sábado, 10 de abril, ás 19.00 horas no Multiúsos da Xunqueira. Tamén participarán Iria Custodio, de Galiza Nova e Ruth Rodríguez, activista e artista.

A inauguración será o sábado, 10 de abril, ás 19.00 horas no Multiúsos da Xunqueira


As exposición e o documental poderán verse ata finais do mes de abril do Multiúsos da Xunqueira.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *