Hoxe é Mércores 28 de Xullo de 2021

Roberto Villar: “As pretensións do Porto para a enseada van de barbaridade en barbaridade”

RANDE

Desde unha cementeira ata unha planta de frigoríficos, pasando por un almacén de colectores. Eses teñen sido nos últimos anos algúns dos usos que a Autoridade Portuaria de Vigo pretende darlle á zona coñecida como explanada de Duches. O concelleiro de Medio Ambiente de Redondela, Roberto Villar, explica que estes son algúns exemplos da política do Porto de Vigo “que só entende o uso do litoral para fins industriais”. O Concello xa presentou alegacións ao Plan de Usos portuario porque “obvia” o patrimonio cultural e natural da enseada de San Simón.

O Concello de Redondela considera que o plan de Delimitación dos Espazos e Usos Portuarios do Porto de Vigo (DEUP) “ignora as demandas deste municipio e a súa realidade patrimonial e ambiental, nun espazo que forma parte da Rede Natura 2000”. Tanto Villar como a alcaldesa Digna Rivas, destacan que o plan portuario é demasiado “simple” e non ten en consideración “os criterios ambientais, paisaxísticos, territoriais, culturais e socioeconómicos do municipio”. Nesa liña, desde o goberno local consideran necesario que este plan recolla temas importantes como “evitar a ocupación innecesaria de chan e os efectos negativos sobre a Rede Natura 2000”. Villar ten claro que o obxectivo da Autoridade Portuaria é centrarse só na actividade industrial “sen ter en conta o valor natural desta zona, que é un espazo único no mundo”.

As actividades que proxecta o Porto tamén prexudicarían sectores “como a pesca artesanal e o marisqueo”, que son sustentables e xeran riqueza no municipio, explica Villar

A falta de rigor no aspecto ambiental ten a súa continuidade no campo patrimonial, xa que o plan mostra un “absoluto esquecemento” do patrimonio do municipio, tanto material como inmaterial. Así, nas alegacións ao DEUP recóllense unha vintena de elementos patrimoniais, recollidos no Plan Básico Autonómico e que se verían afectados o Plan de Usos Portuarios.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *