Hoxe é Xoves 29 de Outubro de 2020

O cemiterio dos Eidos recupera o seu esplendor

RR_Noticias

Dous séculos de historia da vila de Redondela veñen de poñerse en valor grazas ás obras de conservación e mantemento do cemiterio de Eidos, que onte foron inauguradas. A alcaldesa, Digna Rivas, explicaba que a recuperación deste patrimonio histórico, artístico e cultural “responde ao compromiso adquirido coa veciñanza”. Anunciou tamén que se porán en marcha iniciavas como visitas guiadas e exposicións “que contribúan á promoción da súa importancia histórica”.

A alcaldesa de Redondela, acompañada por boa parte dos concelleiros da corporación Municipal e representantes de diferentes colectivos veciñais, inaugurou no serán de onte as obras de conservación e mantemento do cemiterio dos Eidos “un ben patrimonial de primeira orde que levaba anos nun lamentable estado de abandono e deterioro”, segundo sinalaba Rivas. O camposanto, que data de 1833, conta con tallas e panteóns de gran valor artístico e histórico, e nel descansan persoeiros ilustres da vida social, cultural e política do municipio, como os que foran alcaldes da vila Telmo Bernárdez e Ramón Pardo, a mestra Ernestina Otero, o procurador Francisco Crespo, ou o médico e político Alejandro Otero. O cemiterio forma parte tamén da memoria histórica, cunha fosa común que acolle os restos de 42 persoas represaliadas durante os anos da Guerra Civil e a posguerra. Soledad Chayán, guía de turismo, ofreceu unha visita guiada na que explicou a importancia histórica e artísticas deste cemiterio, no que descansa tamén Hohn O Dogherty, un dos heroes da Guerra da Independencia Española na batalla de Ponte Sampaio.
Unha coidadosa recuperación
Os traballos de recuperación comezaron o pasado mes de febreiro, cun custe de 207.000 euros, e contou co financiamento do Fondo Europeo, a través do Programa Operativo FEDER de crecemento sostible 2014-2020. Os traballos tiveron como finalidade poñer en valor este espazo a través dunha total rehabilitación do recinto con actuacións que se centraron en resolver as problemáticas apreciadas nos diferentes elementos que o configuran, dende os muros exteriores que o delimitan ata os pavimentos interiores, pasando por zonas axardinadas, peches, elementos ornamentais, instalacións e servizos urbanos, así como favorecer a accesibilidade universal mediante a realización de actuacións na súa totalidade. Dada a importancia histórica e patrimonial da actuación durante a realización das obras tívose especial coidado en seguir as recomendacións técnicas autorizadas dende Patrimonio cultural. O proxecto foi redactado polo arquitecto Ángel Santorio, quen exerceu as funcións de dirección de obra.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *