Hoxe é Mércores 14 de Abril de 2021

A Comunidade de Montes de Ventosela demanda máis medios na prevención de incendios

RR_Noticias

O presidente do colectivo, Félix Cal, lamenta que as actuais políticas forestais non conten con máis orzamento para a limpeza e coidado do monte, o que serviría para previr lumes como os desta semana. E denuncia que non se está a cumprir a normativa de seguridade que obriga aos propietarios a manter limpo o perímetro das vivendas.

No municipio de Redondela arderon nos últimos días máis de 230 hectáreas, nas parroquias de Ventosela, O Viso e Reboreda. Logo de horas de angustia, nas que o lume cercou ducias de vivendas, os veciños fan balance. En Ventosela, unha das zonas máis afectadas polo lume, volveron vivir a pantasma de 2006, cando os incendios asolaron a bisbarra. Nesta ocasión o drama evitouse, grazas a que os efectivos antiincendios “chegaron antes que daquela, e con máis medios”. O presidente da Comunidade de Montes salienta tamén o traballo “admirable” dos veciños e de persoas chegadas doutros puntos da comarca para axudar nas tarefas de extinción. Coincide coas autoridades en que os lumes dos últimos días foron intencionados, coincidindo cunha xornada, a do martes, de forte vento. Pero tamén advirte de “intereses escuros” detrás dos que queiman o monte. A situación de maior angustia deuse pola proximidade do lume ás vivendas. Cal advirte que existe unha normativa que obriga a manter limpa e sen vexetación unha franxa de 10 metros no perímetro das vivendas, 30 metros máis sen especies pirófitas, e ata os 50 metros a franxa de vexetación debe estar “controlada”. Pero esta normativa “non se cumpre”. Desde a Comunidade de Montes lamentan que non exista “vontade política” para esixir aos propietarios que ese perímetro de seguridade se manteña, co que se evitarían “moitos problemas”. Segundo Cal é “unha mágoa” que nin as autoridades nin a sociedade teñan aprendido nada do acontecido en 2006, e esixe “máis medios na prevención dos incendios”. Sinala que é “moito máis barato” manter limpo o monte para que non arda, que apagar incendios de gran magnitude como os que asolan a bisbarra. Os comuneiros entenden que a política forestal debería servir para fomentar a conservación do monte, e promover a eliminación de especies pirófitas, que arden facilmente, como o eucalipto, piñeiro  ou acacia. Pola contra, Cal entende que a administración debería promover a reforestación cos árbores autóctonas, frondosas que evitan a propagación do lume, como carballos ou salgueiros. Entende que non se pode facer política forestal “desde un despacho”, e que é preciso o consenso das Comunidades de Montes, propietarios, o sector forestal e a industria para chegar a acordos que permitan preservar o monte. Sinala que non se trata só de velar pola riqueza económica que xera o monte, senón tamén polo valor seu social e ecolóxico, como “pulmóns” do territorio.  

Félix Cal presidente da Comunidade de Montes
Nesta ocasión os medios chegaron con máis rapidez e eran máis numerosos que en 2006.
Colaboración veciñal
A axuda de veciños e persoas chegadas doutras parroquias foi admirable.
Medidas de prevención
Cal demanda unha política foresta que manteña o monte limpo para evitar incendios.
Lumes provocados
Cal denuncia intereses escuros detrás dos incendios intencionados.
Perímetros de seguridade nas casas
Lamenta que no se cumpra a normativa que obriga a manter un perímetro de seguridade de 50 metros ao redor das casas.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *