O auditorio do Multiusos acolle esta tarde ás 20:00 horas o recital poético “Atendendo ao meu amigo” no que se poderán escoitar as voces de sete recoñecidos poetas procedentes de Estonia, Turquía, Hungría, Inglaterra, Alxeria, Asturias e Galicia que estes días están a participar no II obradoiro de tradución poética “Con barqueira e remador” na Illa de San Simón.
Unha oportunidade única para todos os que queiran achegarse a escoitar a este poetas recitando na súa lingua propia uns textos que logo son traducidos ao galego por Isaac Xubín. Unha actividade paralela ao Obradoiro que dende o pasado luns reúne en San Simón a sete escritores que están a realizar un intenso labor de tradución literaria da poesía contribuíndo así a dar a coñecer o noso contexto cultural a novas personalidades intelectuais e seguir a estreitar os lazos de intercambio con outros sistemas literarios. Os participantes nesta II edición chegan dende os máis afastados recantos de Europa, África do Norte e EEUU. Xunto á poeta galega Yolanda Castaño, organizadora do evento, recitarán Gökçenur Ç (Turquía), Kätlin Kaldmaa (Estonia), Xuan Bello (Asturias), Samira Negrouche (Alxeria), Lawrence Schimel (EEUU), Anna T. Szabó (Hungría) e Isaac Xubín (Galicia). Este último e mais Yolanda Castaño serán os encargados de traducir ao galego as intervencións dos distintos poetas.
Fálanos do recital que se poderá ver no Multiusos
