Meiga-i actuará co seu proxecto persoal, sen O Rabelo, na Carballeira do Peirao de Arcade o día do Orgullo, 28 de xuño, ás 21:30 horas, con entrada libre. O evento, encadrado na programación do Concello de Soutomaior baixo o nome de “A Orghullosa”, será unha oportunidade para gozar da súa proposta única, que combina música, transformismo e a defensa da diversidade.
A música galega contemporánea dá un paso adiante co lanzamento de 3. Fantasía, a explosiva colaboración entre Meiga-i e O Rabelo, que forma parte do innovador proxecto Xerme, o terceiro libro-disco de O Rabelo. Este tema, que marca o primeiro traballo de estudo de Meiga-i, mestura a tradición galega cunha poderosa mensaxe de inclusión e disidencia queer, reinterpretando melodías populares como Carmiña, Carmela nunha proposta fresca, divertida e comprometida.
3. Fantasía nace da amizade e da visión compartida entre Meiga-i, a primeira drag pandereteira galega, e O Rabelo, un proxecto que fusiona música tradicional con sonoridades urbanas. Este tema forma parte de Xerme, o terceiro disco-libro de O Rabelo, unha ambiciosa proposta que reúne 15 cancións, cada unha en colaboración cun artista diferente, tanto galegos como de fóra, creando un mosaico de historias e estilos que mesturan música e literatura. “Queremos que nos entendan, por iso usamos a ficción, os personaxes e a música para falar de realidades complexas”, explica Meiga-i. A canción aborda temas como as identidades diversas, o adultismo e os dereitos queer cun enfoque lúdico, recreando unha “tarde de merendola entre amigos” que invita á celebración das diferenzas. “Únenos a imaxinación. Quixen levar o folclore galego a un universo de conto de fadas, mesturando o transformismo coa nosa tradición, porque para min é algo natural”, engade Meiga-i.
Meiga-i tamén reivindica a presenza do galego no universo do drag, un espazo onde a lingua e a cultura galega seguen sendo minorizadas. “O drag non ten por que estar ligado á modernidade e ás cidades; tamén pode estar conectado coas nosas raíces e tradicións”, afirma. A artista fai referencia ao libro A defunción dos sexos de Daniela Fernández, historiadora galega que documenta a existencia dun transformista galego que tocaba a gaita, demostrando que estas expresións sempre estiveron presentes na nosa cultura. “Non son a primeira drag en galego, pero si a primeira en dicir claramente que son drag pandereteira, para diferenciar o meu traballo de conceptos como Drag Queen ou Drag King. Trátase de interpretar unha personaxe, e no meu caso son unha pandereteira. A miña inspiración son as mulleres do rural, fortes, traballadoras, que cantaban e tocaban a pandeireta, non as divas pop”, subliña Meiga-i.
O videoclip, gravado en Cerdedo, reflicte tamén un compromiso co territorio. “Escollemos uns prados ameazados por un plan de urbanismo vago. Gravamos alí para non esquecer de onde vimos e defender o que temos: non fan falta pistas de pádel se hai monte onde xogar, nin piscinas artificiais se hai ríos”, afirma Meiga-i. A produción, a cargo de @cru_podu e o seu equipo da comunidade LGBTIQ+, subliña a importancia de que as propias voces disidentes conten as súas historias.
