A Plataforma contra a Masificación Turística de Vigo-O Morrazo reclama establecer límites ao crecemento da actividade turística e apostar por un modelo que sexa compatible coa protección do territorio e coa calidade de vida da veciñanza. A organización, integrada por colectivos sociais e ecoloxistas, aproveita a celebración este sábado, 27 de setembro, do Día Mundial do Turismo para poñer sobre a mesa os efectos que está a provocar a crecente presión turística en diferentes puntos da área de Vigo e do Morrazo, pero tamén na contorna e a nivel estatal.
No caso de Vigo, sinala o incremento das vivendas de uso turístico e a presión sobre os alugueiros, mentres que no Morrazo a chegada masiva de visitantes ás praias supón, segundo apunta, unha presión adicional sobre os servizos e as infraestruturas. Os datos dun informe de Ecoloxistas en Acción sobre a evolución das VUT en 23 cidades españolas sitúan Vigo como o municipio cun maior incremento acumulado deste tipo de aloxamentos entre 2020 e 2024, cunha suba do 113,2 %, ao pasar de 758 a 1.616 vivendas de uso turístico. Só no último ano analizado, entre agosto de 2023 e agosto de 2024, o incremento foi do 36,8 %.
O representante da plataforma alerta ademais de que a presión turística tamén repercute na actividade comercial e na propia configuración das cidades. Segundo sinala, cando determinados barrios perden poboación residente, tamén desaparecen progresivamente negocios destinados ás necesidades cotiás e son substituídos por establecementos orientados ao visitante. O informe de Ecoloxistas en Acción alerta, neste sentido, de que a transformación do uso residencial cara a usos turísticos reduce a oferta de vivenda destinada ao alugueiro de longa duración e pode contribuír ao desprazamento de residentes dos barrios máis tensionados.
Outro dos aspectos que destaca é a capacidade limitada das infraestruturas para absorber picos de poboación durante os meses de maior afluencia. López advirte de que o incremento da poboación pode provocar a sobrecarga das redes de saneamento e problemas de vertidos, unha situación que, segundo apunta, quedou especialmente visible este verán cos peches de praias por contaminación fecal en diferentes puntos da área de Vigo.
Ante esta situación, a plataforma defende establecer límites á capacidade turística de cada territorio en función da súa realidade e do nivel de presión que soporta. López apunta que estes límites deberían ser consensuados coa propia poboación local, xa que non todas as localidades presentan a mesma situación nin teñen a mesma capacidade para asumir visitantes. Entre as medidas que propón figuran limitar o número de vivendas de uso turístico, establecer máximos para as prazas hoteleiras, campings e outros aloxamentos e regular tamén o acceso a determinados espazos naturais cando exista risco de masificación.
Neste sentido, considera que unha taxa turística, por si soa, non resolvería o problema. Desde a plataforma defenden, polo tanto, un modelo turístico baseado na calidade e non no incremento constante do número de visitantes. O colectivo considera ademais que preservar esas condicións tamén pode favorecer a actividade turística a medio e longo prazo.
