A entidade asegura que unha clienta foi impedida de expresarse en galego, que se lle negou inicialmente unha folla de reclamacións e que recibiu un trato intimidatorio. A mobilización será este martes, 4 de agosto, ás 11.00 horas, na rúa Príncipe.
A Mesa pola Normalización Lingüística convocou para este martes, 4 de agosto, unha concentración diante dun establecemento da rúa Príncipe de Vigo para denunciar o que considera un grave caso de discriminación por razón de lingua. A entidade explica que a convocatoria responde á denuncia presentada por unha cidadá a través da Liña do Galego, na que relata que foi instada a abandonar o uso do galego durante a atención comercial e que, posteriormente, atopou dificultades para exercer o seu dereito a presentar unha reclamación.
Segundo a vicepresidenta da Mesa, Elsa Quintas, a afectada acudiu ao comercio para solicitar información sobre un produto e o dependente pediulle que deixase de falar en galego porque, segundo lle indicou, non a entendía. Ao regresar para solicitar unha folla de reclamacións, asegura que a situación derivou nunha discusión na que, ademais de negarlle inicialmente ese documento, se lle trasladou que “non tiña dereito a falar galego” e foi sometida a unha actitude que cualifican de intimidatoria por parte do persoal. A situación rematou, segundo a versión da denunciante, coa expresión de que “non nos interesa tervos a vós como clientes”, unha frase que A Mesa interpreta como unha discriminación cara ás persoas galegofalantes.
Quintas sostén que este comportamento supón “unha vulneración clara dos dereitos lingüísticos” e considera que a gravidade do sucedido vai máis alá da cuestión idiomática. Ao seu xuízo, tamén resulta especialmente preocupante a negativa inicial a facilitar a folla de reclamacións e o trato recibido pola clienta. A vicepresidenta da entidade asegura que “ninguén merece este tipo de trato” e reclama unha rectificación por parte da empresa, así como formación específica para o persoal en materia de dereitos lingüísticos e atención á clientela.
Antes de anunciar a mobilización, A Mesa trasladou formalmente a queixa ao establecemento. Segundo explica Quintas, a resposta obtida non foi satisfactoria, xa que incluso atoparon dificultades para establecer unha vía de comunicación coa empresa. A entidade entende que esta falta de resposta fai necesario un pronunciamento público para visibilizar unha situación que, aínda que cualifica de puntual, considera inaceptable.
A organización lembra que este tipo de incidentes non son os máis frecuentes entre as reclamacións que recibe a través da Liña do Galego, aínda que si asegura rexistrar denuncias relacionadas cos dereitos lingüísticos en ámbitos como o laboral ou a administración pública. Neste sentido, Quintas defende que Galicia debe avanzar cara a unha maior protección legal das persoas consumidoras para garantir tanto o dereito a expresarse en galego como a recibir atención oral e escrita nesta lingua.
Como seguintes pasos, A Mesa prevé trasladar o caso ao Instituto Galego do Consumo ao considerar que poderían existir infraccións administrativas, tanto pola presunta vulneración dos dereitos da consumidora como pola negativa a facilitar a folla de reclamacións. Segundo explica a entidade, corresponde a este organismo valorar a apertura dun eventual expediente sancionador.
A concentración desenvolverase este martes, 4 de agosto, ás 11.00 horas, diante do establecemento situado na rúa Príncipe, e está aberta á participación de toda a cidadanía. A Mesa anima ás persoas galegofalantes a exercer os seus dereitos empregando o galego con normalidade e recorrendo ás follas de reclamacións ou, de ser preciso, solicitando a intervención da Policía Local cando estas lles sexan denegadas.
