Hoxe é Xoves 19 de Novembro de 2026
Stations
NOTHING FOUND!
Current listeners: 
Peak listeners: 

ADEGA impulsa unha campaña para reclamar á Xunta o acordo entre Altri e Impulsa Galicia e alerta de que o proxecto non está morto

ADEGA, xunto coas plataformas Ulloa Viva, Non á Mina de Touro-O Pino e a Plataforma en Defensa da Ría de Arousa, impulsa unha nova campaña para reclamar á Xunta que faga público o acordo asinado entre Impulsa Galicia e Altri para desenvolver a macrocelulosa de Palas de Rei. As entidades piden que dean acceso ao documento e animan á cidadanía a presentar solicitudes de información de maneira masiva nos rexistros da Administración autonómica, mediante un modelo de escrito que facilitarán nas súas páxinas web.

A iniciativa chega nun momento no que ADEGA advirte de que o proxecto non está definitivamente descartado. O Tribunal Superior de Xustiza de Galicia deulle a razón en febreiro ao ordenar que os terreos previstos para a fábrica se incorporasen á Estratexia Galega de Infraestrutura Verde, pero a organización denuncia que a Xunta aínda non executou a sentenza e xa solicitou que se cumpra de maneira forzosa. Ademais, alerta de que os cambios previstos na Lei de Ordenación do Territorio, a través dos orzamentos de 2027, poderían debilitar a protección destes espazos e facilitar unha futura recuperación do proxecto.

Belén Rodríguez, representante de ADEGA, considera que os movementos da Xunta están a preparar o camiño para “eliminar obstáculos legais e permitir que Altri poida retomarse no futuro”. Por iso, pide á cidadanía que non dea a loita por rematada e que estea preparada para volver mobilizarse. A organización asegura que, se o proxecto chega a recibir autorización, recorrerá novamente aos tribunais polos seus posibles efectos ambientais, sobre a saúde e sobre a economía da zona.

A representante ecoloxista tamén pon o foco nas próximas eleccións xerais do 29 de novembro, ao considerar que o resultado pode ser determinante para o futuro do proxecto.

Facebook
Twitter
LinkedIn
Pinterest
WhatsApp