As festas de A Teixeira, na parroquia do Viso, arrancan este venres cun programa que combina tradición, música, churrascada popular e actividades para todos os públicos.
A programación comeza este venres, 4 de setembro, ás 19:00 horas coa celebración da novena e a posterior baixada da Virxe en procesión, acompañada pola charanga Radio Tropical. Unha vez rematado o acto relixioso, o recinto festivo acollerá unha churrascada popular, tamén amenizada pola charanga.
A cea terá un prezo de 12 euros e incluirá media tira de churrasco, medio criollo, medio chourizo e unha tapa de paella. Segundo explica Víctor, integrante da comisión de festas, xa hai reservas para unhas 200 persoas, aínda que a organización prevé preparar máis racións para atender tamén as reservas de última hora.
A noite continuará con propostas musicais e de entretemento para diferentes públicos, coa actuación do humorista Juan de Arcade, o espectáculo de Ashley Ferraro e a sesión de DJ Anhell. Todas as actuacións serán de acceso libre, polo que non será necesario participar na churrascada para achegarse ao recinto e gozar da programación.
Sábado de verbena
O sábado estará reservado para unha das grandes noites festivas de A Teixeira. A partir das 22:00 horas terá lugar unha verbena protagonizada polo dúo La Visión e a orquestra Marbella, cun repertorio pensado tanto para os amantes da música de baile como para o público máis novo.
Víctor destaca precisamente a intención da comisión de ofrecer unha programación variada. “Facémolo enfocado a todos os públicos, pensando tanto na xente maior como nos máis novos”, sinala. A verbena prolongarase ata aproximadamente as 4:00 horas e contará coa barra da comisión, que permanecerá aberta durante as tres xornadas festivas.
O domingo, día grande
O domingo, 6 de setembro, chegará o día grande das festas, marcado especialmente polos actos relixiosos. A xornada comezará ás 12:00 horas coa procesión da imaxe da Santa cara á igrexa parroquial, acompañada pola Banda de Música Municipal da Lama. Durante o percorrido terá lugar o tradicional encontro co Sagrado Corazón de Xesús.
Ás 13:00 horas celebrarase a misa solemne na igrexa parroquial, seguida dunha nova procesión e da ofrenda floral no cemiterio en memoria dos defuntos. Unha parte da celebración que, segundo explica Víctor, mantén un importante significado para a veciñanza: “É o día grande do barrio e a xente xúntase coas familias para o xantar e para compartir o día”.
Xa pola tarde, ás 19:00 horas, os máis pequenos terán o seu espazo coa animación infantil de Héroes da Ciencia. A continuación actuará a Banda Escola de Chapela e, como peche das festas, o trío musical 3.Com poñerá o punto final cun repertorio pensado para o baile e con cancións de diferentes épocas.
“Somos bastante poucos, pero con traballo e cariño todo se fai”, explica Víctor, que tamén aproveita para facer un chamamento á incorporación de novas persoas á comisión. A falta de relevo xeracional é, segundo apunta, unha das principais dificultades: “Sería unha marabilla que algún veciño se animase a botar un cable”.
Con todo preparado, Víctor anima a veciñanza de Redondela e dos concellos próximos a achegarse durante esta fin de semana a A Teixeira.
