Decenas de persoas participaron este martes nunha nova batida para tentar localizar a María Pereira, a veciña viguesa de 75 anos desaparecida desde o pasado 29 de xuño e que padece alzhéimer. A xornada arrancou diante do Concello de Redondela, onde familiares, amigos, compañeiros de traballo e numerosos voluntarios alleos á familia se concentraron tras manter contacto coa alcaldesa e coa Policía Local para coordinar o dispositivo.
Antes do inicio da busca, o fillo da desaparecida, Alexandre, e o seu irmán, Armando, ofreceron unha rolda de prensa na que agradeceron o apoio recibido durante estes días, pero tamén denunciaron a falta de coordinación entre as distintas administracións e corpos de seguridade implicados no operativo.
Alexandre explicou que, oito días despois da desaparición, a única información obxectiva coa que conta a familia segue sendo a facilitada pola Policía Nacional. A última localización do teléfono móbil sitúa a María na zona de Padróns, en Saxamonde, a través das antenas de telefonía, ata o momento no que o dispositivo quedou sen batería na mañá do martes. “A partir de aí todo son hipóteses. Os investigadores continúan revisando cámaras e facendo comprobacións, pero para nós o tempo corre en contra. Xa non imos tarde, imos tardísimo”, lamentou.
O fillo insistiu en que a intención da familia non é cuestionar o traballo dos investigadores, senón reclamar unha maior colaboración entre as distintas administracións. “Nós organizamos as batidas como podemos. Familiares e amigos percorremos xa Cedeira, Reboreda, Cesantes, Arcade, Saxamonde, os montes, camiños e mesmo fomos colocar carteis ata Santiago buscando calquera pista. Pero non somos profesionais nin sabemos organizar un operativo destas características”, explicou.
Segundo denunciou, durante varios días foron os propios familiares quen tiveron que contactar con cuarteis da Garda Civil, concellos limítrofes, comunidades de montes e outros organismos para solicitar colaboración. “Ese traballo non debería recaer sobre unha familia que o único que quere é atopala”, afirmou.
Na mesma liña pronunciouse Armando, irmán da desaparecida, quen asegurou que a familia se viu obrigada a improvisar continuamente a organización das batidas. “Nós non temos experiencia en buscas deste tipo. O que pedimos é que alguén con coñecementos nos coordine, que nos diga como facer os grupos, que zonas revisar e que quede un rexistro do que xa foi inspeccionado”, sinalou.
Ambos coincidiron en que existe unha importante resposta cidadá, pero advertiron que unha elevada participación require tamén unha boa organización. “Non serve de nada convocar a duascentas persoas se despois cada unha busca pola súa conta. O importante é que haxa alguén que coordine o dispositivo”, insistiron.
Durante ese encontro, a alcaldesa de Redondela Digna Rivas trasladou á familia o compromiso do Concello de actuar como enlace entre a Policía Nacional e a Policía Local para facilitar a coordinación das futuras xornadas de busca. Segundo lles comunicou, aínda que a investigación non é competencia da administración local, o Concello manterá un contacto diario cos responsables policiais para coñecer as zonas nas que se estea a traballar e orientar os voluntarios. “Aínda que non sexa competencia do Concello, comprometémonos a colaborar porque calquera axuda é importante”, foi a mensaxe trasladada pola rexedora aos familiares.
Alexandre recoñeceu tamén a dificultade persoal que supón convivir cunha persoa con alzhéimer. Explicou que a súa nai aínda conservaba autonomía para saír pasear e que contaba con sistemas de xeolocalización e outras medidas de seguridade. “Nesta ocasión déronse unha serie de circunstancias moi desafortunadas. Desactivouse o sistema de localización e, xusto ese día, cambiou o percorrido habitual”, relatou, deixando claro que non pretende responsabilizar a ninguén da desaparición.
A familia confirmou ademais que os cans especializados localizaron un pano pertencente a María na zona de Padróns, o que permite confirmar que estivo nese lugar, aínda que desde entón non apareceu ningunha nova pista sobre o seu paradoiro.
Os familiares tamén valoraron positivamente que nas últimas horas comece a percibirse unha maior implicación das administracións. Segundo explicaron, tras protestar, a batida deste martes contou coa colaboración da Policía Nacional, Policía Local e de Protección Civil para mellorar a coordinación sobre o terreo.
A busca centrouse nesta ocasión na zona de saída de Cesantes en dirección ao interior, cara Pontevedra, dividindo os participantes en grupos organizados para revisar camiños, pistas forestais e parcelas nas que aínda non se realizara unha inspección exhaustiva.
A familia mantén intacta a esperanza de atopar con vida a María Pereira e volve facer un chamamento á colaboración cidadá. Piden que calquera persoa permaneza atenta á posible presenza dunha muller desorientada, que podería presentar un aspecto descoidado tras tantos días desaparecida.
María Pereira mide 1,65 metros, é de complexión delgada, ten o pelo castaño e os ollos marróns. No momento da súa desaparición vestía un pantalón branco con cadros negros, zapatillas deportivas brancas e unha chaqueta azul clara.
Calquera información sobre o seu posible paradoiro pode comunicarse a SOS Desaparecidos, ao teléfono 868 286 726, ou directamente ao 112 e ás forzas e corpos de seguridade.
