O Kickboxing Club Arcade volveu demostrar o seu nivel competitivo no Campionato de España de Kickboxing, celebrado en Alcobendas, onde conseguiu un total de 12 medallas grazas á actuación dos seus deportistas nas modalidades de Point Fight e Light Contact.
Aínda que desde o propio club recoñecen que “non foi o mellor campionato dos seus máis de 32 anos competindo a nivel nacional e internacional”, o balance final é moi positivo tendo en conta as especiais circunstancias desta tempada. A incerteza sobre a participación debido aos problemas de saúde do adestrador, a preparación de varios deportistas para os exames da PAU e o cambio de categorías dalgúns dos máis novos condicionaron unha representación máis reducida do habitual. Con todo, os competidores que acudiron á cita responderon cun elevado nivel de compromiso e esforzo conseguindo unha medalla de ouro, cinco de prata e seis de bronce.
Entre os resultados máis destacados figura o ouro conseguido por Cael Andrew Omar O’Neill en Light Contact júnior (-57 kg), ao que sumou ademais unha medalla de prata en Point Fight. Tamén sobresae a actuación de Mencía Díaz Taboada, que logrou dúas pratas nas modalidades de Point Fight e Light Contact na categoría cadete maior (-65 kg).
Pola súa banda, Izan Bouzón Collazo conquistou a prata en Point Fight na categoría cadete menor (-47 kg), mentres que Anxo Martínez Núñez, quen participou unicamente na modalidade de Point Fight, acadou outra prata na categoría cadete maior (+69 kg).
As medallas de bronce chegaron da man de Luca Bouzón Collazo en Point Fight (-32 kg), Daniel Amoedo Vázquez, que sumou dous terceiros postos en Point Fight e Light Contact (-28 kg), Álex Cabaleiro Vidal, tamén con dous bronces en ambas modalidades (-42 kg), e Martín Figueroa Lourido, terceiro clasificado en Point Fight (+69 kg). Pola súa parte, Ismael Villanueva Moares competiu na categoría júnior (-69 kg), sen poder subir ao podio nesta ocasión.
Cael Andrew, preseleccionado para a selección española júnior
As boas noticias para o Kickboxing Club Arcade continuaron esta mesma fin de semana. O competidor Cael Andrew Omar O’Neill participou na concentración organizada pola Federación Española de Kickboxing y Muaythai (FEKM) en Madrid, unha convocatoria destinada á preselección dos deportistas que poderán formar parte da selección española que competirá no Campionato do Mundo Júnior, previsto para finais do mes de setembro en Italia.
