A familia de María Pereira, unha muller de 75 anos que padece alzhéimer, mantén activa a súa procura despois de que desaparecese o pasado luns 29 de xuño do seu domicilio en Vigo. A última localización do seu teléfono móbil, facilitada pola Policía Nacional, sitúaa na parroquia de Saxamonde.
Ante a falta de noticias sobre o seu paradoiro, a familia fai un chamamento á colaboración da veciñanza para que permaneza atenta á posible presenza dunha muller desorientada que, tras varios días desaparecida, podería presentar un aspecto descoidado.
A asociación SOS Desaparecidos emitiu unha alerta para solicitar a colaboración cidadá. María Pereira mide 1,65 metros, é de complexión delgada, ten o pelo castaño e os ollos marróns. No momento da súa desaparición levaba un pantalón branco de cadros negros, zapatillas deportivas brancas e unha chaqueta azul claro.
O seu fillo, Alexandre, explica que familiares e voluntarios xa percorreron distintas parroquias de Redondela na procura de calquera indicio. A principal hipótese é que poida atoparse desorientada nalgún camiño, monte ou galpón, sen capacidade para pedir axuda debido á enfermidade que padece.
“Seguimos con esperanza, pero a desesperación aumenta a medida que pasan os días sen ningunha pista”, asegura.
A familia amosa tamén a súa preocupación polas altas temperaturas rexistradas estes días, xa que temen que María non sexa consciente da necesidade de hidratarse, o que podería agravar a súa situación.
Calquera persoa que dispoña de información sobre o seu posible paradoiro pode contactar con SOS Desaparecidos no teléfono 868 286 726 ou a través do correo electrónico info@sosdesaparecidos.es. En caso de localizala, recoméndase avisar de inmediato ao 112 ou ás forzas e corpos de seguridade.
