Hoxe é Domingo 29 de Novembro de 2020

Preocupación en Soutomaior polas consecuencias do transvasamento do río Verdugo

RR_Noticias

O transvasamento do río Verdugo para garantir o abastecemento de auga á área de Vigo aínda non ten claras as súas consecuencias, feito que preocupa no Concello. O alcalde, Agustín Reguera, remitiu persoalmente unha carta á conselleira de Medio Ambiente da Xunta de Galicia, Beatriz Mato, solicitando información sobre as repercusións que este transvasamento pode ter para o conxunto ambiental do río Verdugo e a ría de Vigo. Dende o BNG critican a escasa información sobre as posíbeis consecuencias que esta obra  poida ter e esixen á Xunta que protexan os bancos marisqueiros de Arcade.

O alcalde da localidade trasladou xa un escrito á Xunta no que “solicita a creación dun informe técnico para avaliar o posible impacto do descenso de caudal na flora e fauna do río Verdugo, así como as posibles consecuencias que o transvasamento tería para os bancos marisqueiros de Arcade”.
Do mesmo xeito, o rexedor trasladou á conselleira o rexeitamento do Concello de Soutomaior ao trazado proposto no estudo inicial do transvasamento, que atravesaría o barrio de Aranza, “dividindo o barrio e creando unha infinidade de problemas aos veciños”, explicou o alcalde, que avanzou que se convocou a todos os portavoces municipais para analizar a situación e considerar as futuras medidas.
De feito, dende o BNG xa amosaron a súa preocupación polas consecuencia que este trasvase poida ter nos bancos marisqueiros. Explica o portavoz do BNG Manu Lourenzo que nos últimos días tiveron xuntanzas e recibiron chamadas de diferentes persoas e colectivos que amosaban a súa preocupación, polo que esixirán a Augas de Galicia que é o organismo responsable da xestión das augas, que garanta a protección dos bancos marisqueiros. Ao seu entender a redución do caudal ecolóxico do Verdugo pode ter importantes consecuencias para os bancos marisqueiros xa que a redución do caudal afectaría as correntes nun ecosistema xa de por si moi agredido.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *