Hoxe é Xoves 22 de Outubro de 2020

As escolas infantís quedan sen galegofalantes en Redondela

RR_Noticias

Así o reflicten as enquisas lingüísticas nas escolas infantís de Redondela que indican que só un 29% das familias queren educar as súas crianzas en galego, fronte un 71% que opta polo castelán. Especialmente preocupante é o caso da escola da Marisma, no casco urbano, onde só o 15% das familias escolleron a lingua galega. Os datos desagregados apuntan un mellor dato nas escolas de Ventosela e San Pedro en Cesantes, nas que hai empate entre as dúas linguas.

O Servizo de Normalización Lingüística de Redondela a través do seu técnico Xurxo Martínez amosa a súa preocupación ante estes datos negativos. Un resultado que reflicte o proceso de substitución lingüística por mor do abandono do galego. Reverter este proceso pasa necesariamente por implementar, dende a Xunta de Galicia, políticas lingüísticas que favorezan o uso do galego en todos os ámbitos e tamén na escola. Neste sentido apunta Martínez que sería necesario facer unha revisión crítica do decreto do plurilingüismo que establece, entre outras cuestións, que a lingua vehicular en educación infantil é elixida mediante unha consulta aos pais e nais. Uns proxenitores que maioritariamente están a elixir o castelán en detrimento do galego.   Lembra tamén que se dan situacións paradoxais como que en Galicia “haxa máis material didáctico en inglés que en galego”. Fan fincapé tamén dende o Servizo de Normalización que é necesario actuar noutras esferas máis aló do ensino “é responsabilidade de todos deter ese proceso de substitución do galego”. Como dato positivo apunta que moitos dos rapaces e rapazas que son educados en galego nos seus primeiros anos de vida, malia deixar este idioma a favor do castelán ao seren escolarizados, en moitos casos regresan ao galego a partir dos 16 anos.  

Xurxo Martínez Normalización Lingüística
Uns datos preocupantes
Políticas lingüísticas
Necesario corrixir as políticas para deter o retroceso do idioma
Compromiso das familias
Cómpre tamén que as familias se comprometan co idioma

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *