O prezo do combustible continúa a ser unha das principais preocupacións da frota galega. As confrarías consideran insuficientes as medidas adoptadas polo Goberno e reclaman un novo sistema de apoio que permita reducir de maneira inmediata o impacto dos custos enerxéticos sobre a actividade pesqueira.
A principal reivindicación pasa por incrementar a axuda e aplicala directamente no momento de repostar. A Federación Nacional de Confrarías acordou situar en 80 céntimos por litro o prezo máximo que debería pagar a frota, unha proposta que, segundo explica o presidente da Federación Galega de Confrarías, José Antonio Pérez Sieira, responde á evolución do prezo do combustible nos últimos meses.
“Xa non chega cos 20 céntimos”, sinala Pérez Sieira. O representante do sector lembra que esa bonificación se estableceu cando o combustible estaba arredor dos 70 céntimos por litro, mentres que actualmente, segundo apunta, nalgunhas zonas de Galicia chega a situarse entre 1,25 e 1,30 euros por litro. Por iso, considera que manter a mesma axuda supón unha perda progresiva de capacidade para afrontar os custos.
As confrarías tamén cuestionan o actual sistema de cálculo das compensacións. Defenden que a axuda se determine en función do combustible que realmente consome cada embarcación, en lugar de utilizar estimacións baseadas na arte de pesca, a potencia do motor ou outras características do barco.
En xogo, a rendibilidade da frota
O incremento dos custos afecta directamente á rendibilidade das empresas pesqueiras. Pérez Sieira calcula que o combustible pode representar arredor do 50% dos custos de produción dalgunhas embarcacións, mentres que as cotizacións á Seguridade Social supoñen outro 7 ou 8%.
Neste contexto, as confrarías reclaman tamén unha exención das cotizacións á Seguridade Social, polo menos ata finais de ano, mentres se busca unha solución á situación do combustible.
Mobilizacións se non hai resposta
As confrarías non descartan novas mobilizacións se o Goberno non atende as súas reivindicacións. A decisión, explican, pretenden adoptala de maneira coordinada a través da Federación Nacional de Confrarías, evitando actuacións illadas por comunidades.
O sector está agora á espera de trasladar as súas demandas ao ministro e coñecer a resposta do Executivo. Se non hai avances, poderían adoptarse medidas de presión que poderían incluír mobilizacións ou mesmo a paralización da frota.
Máis alá do combustible, as confrarías reclaman tamén cambios noutras cuestións que condicionan o futuro da pesca, entre elas a burocracia, as cotas e o reparto dos recursos pesqueiros.
