O obradoiro de Estudos Locais de Cesantes denuncia o estado de abandono no que se atopa o antigo Torreiro da parroquia, un espazo que no pasado acollía algunhas das celebracións máis importantes da zona e que na actualidade presenta unha imaxe degradada “con colectores do lixo ocupando o lugar ou incluso un remolque de grandes dimensións destinado á reciclaxe pegado ao cruceiro poñendo en perigo a súa integridade”.
A entidade cultural salienta a relevancia do espazo no que durante os anos 60 se celebraban festas como as de San Pedro, o Santísimo Cristo ou a Inmaculada Concepción. O torreiro foi habilitado na década de 1960 grazas a adquisición de terreos por parte da Comisión de Festas da época e chegou a ser coñecido como praza de San Pedro, segundo recollen os medios de prensa da época.
Dende o Obradoiro Fernando Monroy explican que xa trasladaron en varias ocasión ao Concello de Redondela unha proposta de recuperación do espazo, un proxecto que contempla a posta en valor da Praza, a protección do cruceiro e a creación dunha zona de esparexemento para a veciñanza, en liña con outras actuacións de humanización impulsadas en distintas parroquias do municipio.
A iniciativa inclúe incluso un primeiro esbozo elaborado por un arquitecto urbanista, e busca devolver a este espazo a súa relevancia social e cultural dentro de Cesantes.
